Mbreti Charles III ishte paralajmëruar që në vitin 2019 se emri i Familjes Mbretërore po “abuzohej” për shkak të lidhjeve të biznesit të Prince Andrew, sipas një emaili të publikuar së fundmi nga mediat britanike.
Sipas dokumenteve, një sinjalizues kishte informuar Pallatin Mbretëror për lidhjet e fshehta financiare të ish-Dukës së York-ut me financierin milioner David Rowland, duke pretenduar se ai po përfitonte nga lidhjet me familjen mbretërore për interesa personale dhe biznesi.
Mesazhet e publikuara sugjerojnë se Andrew i kishte lejuar financierit të përfshihej në mënyrë efektive në aktivitetet e tij zyrtare, ndërsa skandali rrezikon të përfshijë më tej edhe monarkun britanik në krizën që lidhet me kontaktet e Andrew me Jeffrey Epstein.
Sipas burimeve, Andrew e kishte cilësuar Rowland si “njeriun e tij të besuar për financat”, ndërsa ky i fundit dhe djali i tij kishin marrë pjesë në udhëtime zyrtare të princit gjatë periudhës kur ai shërbente si i dërguar tregtar i Mbretërisë së Bashkuar (2001–2011).
Emaili i sinjalizuesit pretendon gjithashtu se Rowland kishte ndihmuar financiarisht ish-bashkëshorten e Andrew, Sarah Ferguson, me 40 mijë paund për shlyerjen e borxheve dhe se në vitin 2017 kishte shlyer një kredi prej 1.5 milionë paundësh për princin.
Në mesazhet drejtuar Pallatit Mbretëror, sinjalizuesi pretendonte se marrëdhënia e Andrew me financierin ishte më e rëndësishme për të sesa lidhjet familjare, ndërsa ngrinte edhe akuza për pagesa të supozuara për sigurimin e një licence bankare në Luksemburg për bankën private të Rowland.
Buckingham Palace nuk ka komentuar mbi akuzat për shkak të hetimeve në vazhdim, ndërsa autoritetet policore janë ftuar të shqyrtojnë materialet e publikuara.
Ndërkohë, në Mbretërinë e Bashkuar janë shtuar thirrjet politike për hetime të plota dhe për largimin e Andrew nga radha e trashëgimisë së fronit, ndërsa skandali vazhdon të shkaktojë debate të forta publike dhe institucionale.
