Zonja e parë e Shteteve të Bashkuara, Melania Trump, ka ndarë disa detaje interesante për zakonet e natës të bashkëshortit të saj, Donald Trump.
Në një intervistë për Fox News, Melania pranoi se gjumi nuk është pjesë e fortë e rutinës së presidentit.
Ai nuk fle shumë
-tha ajo me humor, duke shtuar:
Por, sigurisht, fle!
Kur moderatori Greg Gutfeld e pyeti nëse Trump vesh pizhamë, Melania u përgjigj me një buzëqeshje të fshehtë:
Jo
-duke shmangur me elegancë çdo detaj tjetër.
Trump vetë është mburrur disa herë se gjatë mandatit të tij në Shtëpinë e Bardhë flinte vetëm katër ose pesë orë në natë, një zakon që, sipas tij, i lejonte të ishte “më produktiv” se të tjerët. Ky ritëm, megjithatë, ka rezultuar lodhës për njerëzit përreth tij.
Gazetarja e CNN-it, Kaitlan Collins, e cila e ka ndjekur nga afër gjatë udhëtimeve zyrtare, ka treguar se mungesa e gjumit e Trumpit ishte një sfidë për gjithë stafin.
Një burim më tha njëherë: ‘Kurrë mos dëshiro të jesh në Air Force One gjatë një udhëtimi me Trump’. Ai nuk flinte kurrë, madje as në fluturime drejt Azisë, kur të gjithë të tjerët përpiqeshin të pushonin pak
-tha Collins në podcastin Trading Secrets.
Sipas saj, Trump shpesh i zgjonte anëtarët e stafit në mes të natës për të diskutuar çështje politike ose për të komentuar diçka që kishte parë në media.
Nëse dikush flinte, ai urdhëronte që ta zgjonin, sepse donte të fliste
-shtoi gazetarja.
Në një raport të përgatitur nga Collins dhe Kevin Liptak për CNN, përshkruhet sesi ish-presidenti shpesh i thërriste këshilltarët në zyrën e tij në avion në orët e vona të natës, ndërsa pjesa tjetër e ekuipazhit flinte.
Ai diskutonte për takimet e ardhshme ose përgatitej për reagime ndaj lajmeve të fundit.
Mesa duket, ndërsa pjesa tjetër e stafit përpiqej të pushonte në fluturimet e gjata, Donald Trump ishte gjithmonë zgjuar — dhe gjithmonë në kërkim të një bisede të re.
