Microsoft njoftoi së fundmi se po pushon nga puna 3% të punonjësve në të gjitha nivelet, ekipet dhe zonat gjeografike, duke prekur rreth 6,000 persona. “Ne vazhdojmë të zbatojmë ndryshime organizative të nevojshme për ta pozicionuar më së miri kompaninë për sukses në një treg dinamik”-tha një zëdhënës i Microsoft në një deklaratë për CNBC. Kompania raportoi rezultate më të mira se sa pritej, me 25.8 miliardë dollarë të ardhura neto tremujore dhe një parashikim optimist në fund të prillit.
Microsoft kishte 228,000 punonjës në të gjithë botën në fund të qershorit. Shteti i Uashingtonit tha se kompania po zvogëlonte numrin e punonjësve të lidhur me selinë e saj në Redmond me 1,985 persona, përfshirë 1,510 në zyrë. Në total, ka të ngjarë të jetë raundi më i madh i pushimeve nga puna i Microsoft që nga eliminimi i 10,000 roleve në vitin 2023. Në janar, kompania njoftoi një raund të vogël pushimesh nga puna që bazoheshin në performancë. Këto shkurtime të reja vendesh pune nuk lidhen me performancën. Një objektiv është të zvogëlohen shtresat e menaxhimit.
Në janar, Amazon njoftoi se po largonte disa punonjës pasi vuri re “shtresa të panevojshme” në organizatën e saj. Javën e kaluar, ofruesi i softuerëve të sigurisë kibernetike CrowdStrike, njoftoi se do të pushonte nga puna 5% të fuqisë punëtore. Në janar, CEO i Microsoft, Satya Nadella, u tha analistëve se kompania do të bënte ndryshime në ekzekutimin e shitjeve pasi kompania shënoi një rritje më të ngadaltë se sa pritej në të ardhurat e cloud-it Azure, e cila nuk ishte e lidhur me inteligjencën artificiale. Performanca në rritjen e cloud-it të AI-së i tejkaloi parashikimet e brendshme. Aksionet e Microsoft përfunduan tregtimin me 449.26 dollarë, çmimi më i lartë deri më tani këtë vit. Ato u mbyllën në një rekord prej 467.56 dollarësh korrikun e kaluar.
Microsoft vazhdon t’i shtyjë njerëzit të zgjedhin kompjuterin Copilot+. Këtë herë, është një postim në blogun zyrtar me titull “Kompjuterët Copilot+ janë kompjuterët më të fuqishëm me Windows të prodhuar ndonjëherë. Tani ata kanë më shumë veçori të inteligjencës artificiale për t’ju ndihmuar çdo ditë”. Ky njoftim është, në thelb, një “letër dashurie” e gjatë nga vetë kompania rreth arsyes pse përdoruesit e Windows 10 duhet të blejnë një kompjuter Copilot+.
