Këngëtarja e njohur Miley Cyrus është përfshirë në një konflikt ligjor lidhur me të drejtat e autorit, pasi akuzohet se ka përdorur pa leje elemente melodike nga kënga e Bruno Mars, “When I Was Your Man”, në hitin e saj “Flowers”.
Padia është ngritur nga Tempo Music Investments, një kompani që zotëron të drejtat e autorit të këngës së Marsit.
Kjo përfshin gjithashtu shkrimtarët e “Flowers”, Michael Pollack dhe Gregory Hein, si dhe dy kompani të mëdha muzikore, Sony Music dhe Apple.
Padia ngre pretendimin se “Flowers” është një ripërpunim i paautorizuar i “When I Was Your Man”, duke theksuar ngjashmëritë e dukshme midis dy këngëve që u vunë re menjëherë pas publikimit të “Flowers” në vitin 2023. Sipas palës paditëse, kënga e Cyrus nuk do të ekzistonte pa ndikimin e kompozicionit të Bruno Mars.
Nga ana tjetër, Miley Cyrus ka refuzuar të gjitha akuzat dhe ka kërkuar hedhjen poshtë të padisë. Avokatët e këngëtares kanë paraqitur një mocion ligjor, duke argumentuar se vetëm ata që mbajnë të drejtat ekskluzive të një vepre mund të ngrenë padi për shkelje të të drejtës së autorit.
Sipas tyre, për shkak se shkrimtarët e “WIWYM” nuk janë pronarë ekskluzivë të të drejtave, ata nuk kanë të drejtë të padisin për shkelje të të drejtës së autorit.
Ky rast ka tërhequr vëmendjen e fansave dhe industrisë muzikore, duke ngjallur diskutime të mëdha në lidhje me të drejtat e autorit dhe ndikimin e mundshëm të këngëve të tjera në krijimtarinë artistike.
