Marka suedeze Volvo bëhet prodhuesi i parë i makinave që fut çelik të ricikluar me emetim zero në prodhimin serik të automjeteve. Volvo Cars ka nënshkruar një kontratë me prodhuesin suedez të çelikut SSAB, për të furnizuar çelik të ricikluar me emetime pothuajse zero të dioksidit të karbonit, me dërgesa që fillojnë këtë vit. Materiali i ri do të përfshihet në SUV-in tërësisht elektrik EX60, si dhe në modele të tjera të bazuara në platformën e re mekanike SPA3.
“Çeliku është përgjegjës për rreth 25 përqind të emetimeve totale të materialit në një makinë të re Volvo”-tha Francesca Gamboni, drejtoresha e zinxhirit të furnizimit të kompanisë. Çeliku i ricikluar i furnizuar nga SSAB zvogëlon emetimet e CO₂ me pothuajse 100 përqind krahasuar me çelikun konvencional, duke ruajtur të njëjtën forcë dhe siguri.
Ndërkaq, Volvo po përgatit lançimin e SUV-it elektrik EX60, i cili do të jetë zëvendësuesi i modelit të njohur XC60. Ky model i ri do të mbërrijë në fillim të vitit 2026 dhe do të jetë i bazuar në platformën e përmirësuar SPA3. Një imazh i publikuar në rrjetet sociale tregon dritat e pasme të SUV-it dhe LED-e të theksuara. Volvo e përshkruan EX60-n si një model “plotësisht i definuar nga softueri dhe që do të evoluojë me kalimin e kohës”.
Edhe pse detajet për fuqinë e makinës nuk janë zbuluar ende, pritet që të ketë variante me një ose dy motorë elektrikë. Bateria mund të jetë e ngjashme me atë të ES90, me kapacitet rreth 102 kWh dhe autonomi deri në 644 km. Një nga risitë është brezi i sigurisë me sensorë që përshtatet me trupin e pasagjerit për mbrojtje më të mirë në rast aksidenti. Volvo po fokusohet në teknologji dhe siguri për të ardhmen e këtij SUV-i elektrik.
