Prodhuesi suedez i makinave Volvo Cars ka njoftuar planet për të shkurtuar rreth 3,000 vende pune administrative për të ulur kostot, ndërsa po zhvendos fokusin nga automjetet plotësisht elektrike në ato hibride plug-in. Një total prej 3,000 vendesh pune do të shkurtohen në nivel global, sipas kompanisë me seli në Göteborg, e cila kontrollohet nga grupi kinez Geely. Shifra korrespondon me afërsisht 15 përqind të vendeve të punës në zyrë të Volvo Cars. Shumica e tyre ndodhen në Suedi.
Duke njoftuar bisedimet me sindikatat, drejtori ekzekutiv Hakan Samuelsson tha se atyre iu desh të merrnin vendime të vështira. “Industria e automobilave po kalon një fazë të vështirë. Për ta kapërcyer atë, kostot duhet të ulen në mënyrë strukturore”-shtoi Samuelsson. Menaxheri njoftoi mbylljen e vendeve të punës që në fund të prillit, kur njoftoi rezultatet e biznesit në tremujorin e parë. Një shumë shtesë prej 18 miliardë kronësh suedeze (pak më pak se 1.9 miliardë dollarë) synohet të kursehet nëpërmjet masave të tjera.
Shpenzime të veçanta prej rreth 1.5 miliardë kronash do të parashikohen në tremujorin e dytë. Volvo u përqendrua shumë herët në prodhimin e automjeteve plotësisht elektrike dhe në vitet e fundit ka vuajtur pasojat e kostos së lartë të materialeve të baterive. Menaxheri thekson se në të ardhmen synojnë ta zhvendosin fokusin te hibridet plug-in. Që në tremujorin e parë, pjesa e makinave plotësisht elektrike u ul në 19 përqind, nga 21 përqind në të njëjtën periudhë të vitit të kaluar.
Ndërkaq, Volvo Trucks do të fillojë të marrë porosi për kamionin e saj të ri elektrik për distanca të gjata, Volvo FH Aero Electric, në tremujorin e dytë të vitit 2026. Megjithatë, që tani, po zbulohen imazhe dhe më shumë detaje rreth kamionit të ri elektrik, ndërsa klientët gjithashtu mund të nënshkruajnë një letër qëllimi për të blerë kamionin e ri. FH Aero Electric i ri është projektuar për detyra transporti në distanca të gjata, një segment që përfaqëson një pjesë të madhe të emetimeve të CO2 të transportit me kamionë dhe i cili ka qenë sfidues për t’u elektrizuar deri më tani.
