Microsoft po sjell modelin o1 të OpenAI për të gjithë përdoruesit e Copilot. Nuk do të jetë e nevojshme të abonoheni në planin Copilot Pro prej 20 dollarësh në muaj apo në ChatGPT Plus, pasi Microsoft po e ofron atë falas për të gjithë përdoruesit e Copilot. Think Deeper, siç e quan Microsoft këtë integrim të modelit o1, funksionon duke i lejuar Copilot të trajtojë pyetje më komplekse. Përdoruesit mund të shtypin butonin Think Deeper brenda Copilot dhe pas rreth 30 sekondash, ai do të analizojë pyetjen nga të gjitha këndvështrimet dhe perspektivat.
Microsoft e lançoi për herë të parë Think Deeper në tetor si një veçori eksperimentale brenda Copilot Labs, e cila u ofron abonentëve të Copilot Pro mundësinë për të testuar risitë që Microsoft është duke zhvilluar. Ashtu si ChatGPT Plus, Think Deeper ofron përgjigje hap pas hapi për pyetje komplekse, duke e bërë të dobishëm për krahasimin e opsioneve, krijimin e kodit për aplikacione ose planifikimin e një udhëtimi të gjatë me makinë.
Drejtori Ekzekutiv i Microsoft AI, Mustafa Suleyman, njoftoi dje në një postim në LinkedIn se kompania do ta ofrojë Think Deeper falas për të gjithë përdoruesit e Copilot. “Jam vërtet i emocionuar që dhjetëra miliona përdorues tanë do të kenë këtë mundësi”-tha Suleyman. “Kemi shumë më tepër në proces dhe mezi pres t’ju tregoj për risitë e ardhshme”-shtoi ai.
Disa ditë pasi kompania kineze DeepSeek zbuloi një përparim AI që tronditi industrinë e teknologjisë në SHBA, shefat ekzekutivë të Microsoft dhe Meta mbrojtën shpenzimet masive që ata thanë se ishin thelbësore për të qëndruar konkurrues në fushën e re. Përparimi i shpejtë i DeepSeek ka ngjallur dyshime për udhëheqjen që ka Amerika në AI me modele që ajo pretendon se mund të përputhen apo edhe t’i tejkalojnë rivalët perëndimorë me kosto, por drejtuesit amerikanë thanë se ndërtimi i rrjeteve të mëdha kompjuterike ishte i nevojshëm për t’i shërbyer nevojave të korporatave në rritje.
