Një vendim i rëndësishëm nga Gjykata e Romës ka tronditur politikat e abonimit të Netflix në Itali, duke hapur rrugën për rimbursime të konsiderueshme për përdoruesit.
Sipas “Movimento Consumatori”, gjykata ka pranuar padinë e ngritur prej tyre dhe ka konstatuar se disa klauzola kontraktuale të kompanisë janë të padrejta dhe të pavlefshme.
Bëhet fjalë për praktikat që i lejonin Netflix të ndryshonte në mënyrë të njëanshme çmimet dhe kushtet e abonimit gjatë periudhës 2017 – janar 2024. Sipas vendimit, këto veprime cenojnë drejtpërdrejt të drejtat e konsumatorëve.
Pasojat mund të jenë të mëdha:
-Një abonent premium mund të përfitojë deri në 500 euro rimbursim.
-Një përdorues i planit standard rreth 250 euro.
Organizata thekson gjithashtu se rritjet e çmimeve, përfshirë edhe planin bazë, duhet të reflektohen me ulje të menjëhershme nga kompania.
Presidenti i Movimento Consumatori, Alessandro Mostaccio, ka paralajmëruar se nëse Netflix nuk ndërmerr hapa konkretë për të kompensuar klientët, mund të nisë një padi kolektive për të rikuperuar paratë e paguara padrejtësisht.
Ky vendim mund të krijojë precedent edhe për vende të tjera, duke vënë gjigantët e streaming nën presion për më shumë transparencë dhe drejtësi ndaj abonentëve.
