Nicola Peltz është rikthyer në rrjetet sociale mes tensioneve të vazhdueshme me familjen Beckham, duke publikuar një tjetër postim që shumë e interpretuan si një “thumb” i koduar ndaj vjehrrëve të saj të famshëm.
Aktorja 30-vjeçare ndau në Instagram një homazh për ikonën franceze të kinemasë, Brigitte Bardot, e cila u nda nga jeta të dielën në mëngjes në moshën 91-vjeçare, pas muajsh sëmundjeje.
E njohur si një dashuruese e madhe e kafshëve, Nicola postoi një foto të vjetër të Bardot me qentë e saj, duke nënvizuar edhe një herë ndjeshmërinë e saj për mbrojtjen e kafshëve.
Por ajo që tërhoqi më shumë vëmendje ishte citimi që ajo shpërndau pak orë pas vdekjes së Bardot:
Nëse do të mund të ndryshoja mënyrën se si njerëzit sillen me njëri-tjetrin, do ta bëja. Por meqë nuk mundem, do t’u përkushtohem kafshëve.
Për shumë ndjekës, ky mesazh u pa si një koment i tërthortë mbi situatën e tensionuar familjare që po kalon bashkëshorti i saj, Brooklyn Beckham.
Ndërkohë, Brooklyn, 26 vjeç, djali i madh i David dhe Victoria Beckham, ka munguar sërish në një tjetër event të rëndësishëm familjar: dasmën e shoqes së ngushtë Holly Ramsay me notarın olimpik Adam Peaty. Mungesa e tij vjen mes përçarjes së thellë me familjen, e cila thuhet se shpërtheu pasi ai mungoi në festën e 50-vjetorit të të atit.
Edhe pse burime pranë familjes Ramsay kanë lënë të kuptohet se “dera është gjithmonë e hapur” për Brooklyn, ai zgjodhi të qëndronte në Los Angeles, ndërsa pjesa tjetër e familjes Beckham festonte në Britani.
Në të njëjtën kohë, Brooklyn publikoi një postim me temë Grinch, që u interpretua si një tjetër sinjal i distancimit nga familja.
Situata u ndez edhe më shumë kur Nicola postoi një selfie elegante nga LA me mbishkrimin “Dua të jem në shtëpi”, pikërisht në ditën e dasmës së Holly-t. Brooklyn nuk vonoi të reagojë, duke komentuar: “Damn she sexy xx”.
Sipas raportimeve, Brooklyn ka kaluar Krishtlindjet me familjen miliardere të Nicola-s dhe ka munguar në shumë evente të rëndësishme të Beckhamëve gjatë vitit të fundit, përfshirë ditëlindje, festa dhe pushime familjare.
Madje, vëllai i tij Cruz ka zbuluar se Brooklyn kishte bllokuar të gjithë familjen në rrjetet sociale, pas zërave se ata e kishin “unfollow”-uar.
Tensionet duket se kanë prekur edhe miqësitë e vjetra. Marrëdhënia e Brooklyn me Jack Ramsay, dikur shoku i tij më i ngushtë që nga fëmijëria, raportohet se është ftohur ndjeshëm, që nga momenti kur ai nisi lidhjen me Nicola.
Ndërsa David, Victoria, Romeo, Cruz dhe Harper u panë të gjithë së bashku në dasmën madhështore në Bath Abbey, mungesa e Brooklyn vazhdon të ngrejë pikëpyetje. A është kjo një krizë kalimtare apo një ndarje e pakthyeshme?
Një gjë është e sigurt: çdo postim i Nicola Peltz tashmë lexohet me lupë dhe çdo fjali e saj duket se shton edhe më shumë benzinë mbi zjarrin e një prej përçarjeve më të komentuara në botën e showbiz-it.
