Norvegjia ka shpallur se çdo student, pavarësisht prejardhjes apo kombësisë, mund të ndjekë studimet në universitetet publike të saj pa paguar tarifa shkollimi.
Në universitetet publike norvegjeze, e vetmja pagesë që kërkohet është një tarifë simbolike semestrale (zakonisht 30–60 euro), e cila mbulon shërbimet studentore.
Programet ofrohen në fusha të shumta, nga inxhinieria dhe teknologjia, tek mjekësia, shkencat shoqërore dhe artet. Shumë prej tyre zhvillohen në gjuhën angleze, duke u bërë të qasshme për studentët ndërkombëtarë.
Si të aplikoni?
-Studentët mund të aplikojnë përmes platformës zyrtare “Samordna Opptak” (për programet në norvegjisht) ose direkt në faqet e universiteteve për programet në anglisht.
-Afatet e aplikimit ndryshojnë sipas universitetit, por zakonisht aplikimet hapen në nëntor dhe mbyllen në janar ose mars për vitin akademik që fillon në gusht/shtator.
-Dokumentet kryesore që kërkohen janë: diploma e shkollës së mesme ose bachelor (në varësi të nivelit të studimit), rezultatet e gjuhës angleze (IELTS/TOEFL) dhe për disa programe, përvoja e mëparshme akademike ose profesionale.
Çfarë duhet të keni parasysh?
Edhe pse arsimi është falas, studentët duhet të mbulojnë vetë shpenzimet e jetesës. Norvegjia është ndër vendet më të shtrenjta në Evropë, me një kosto mujore që varion nga 1,000 deri në 1,400 euro për akomodim, ushqim dhe transport. Megjithatë, shumë universitete ofrojnë bursa jetese dhe ndihma financiare për studentët ndërkombëtarë.
Ky model bën që Norvegjia të renditet ndër destinacionet më tërheqëse për studentët nga e gjithë bota, duke dëshmuar se arsimi është një e drejtë universale dhe jo një privilegj.
