Khloé Kardashian ka reaguar ashpër ndaj ish-bashkëshortit të saj, Lamar Odom, duke deklaruar se nuk ka ndërmend të bashkëpunojë më kurrë me të.
Debati mes tyre u rikthye në vëmendje pas publikimit të dokumentarit të Netflix, “Untold: The Death & Life of Lamar Odom”, i cili u shfaq më 31 mars dhe trajton jetën e Odom, përfshirë betejën e tij me drogën dhe mbidozën pothuajse fatale në vitin 2015.
Në dokumentar, ish-lojtari i NBA-së flet hapur për martesën e tij me Kardashian dhe pranon se ajo kishte edhe një dimension përfitimi personal.
Unë jam tashmë Lamar Odom… dhe shikoj si jeton ajo dhe familja e saj dhe them: ‘E di që këtu dua të jem’
-shprehet ai, duke lënë të kuptohet se lidhja kishte lidhje edhe me statusin dhe ndikimin e familjes Kardashian.
Miku i tij i ngushtë, Anthony “Pumpkin” Booker, konfirmon këtë version, duke treguar se Odom i kishte folur për orë të tëra në ditën e dasmës për vendimin e tij, të cilin e lidhte me përmirësimin e së ardhmes së tij.
Vetë Odom e përshkruan martesën si një “udhëtim pushteti”, duke theksuar se kaloi nga fama si kampion i Los Angeles Lakers në aksesin ndaj ndikimit të familjes Kardashian:
Por unë nuk isha vërtet gati për kaq shumë pushtet.
Deklaratat e tij kanë nxitur reagimin e menjëhershëm të Khloé Kardashian, e cila në podkastin e saj “Khloé in Wonder Land” u shpreh e indinjuar:
Po rri ulur para kamerës dhe thua se u martove me mua për publicitet? Çfarë? Kjo është kaq e sëmurë. Ndihem kaq budallaqe.
Ajo theksoi se kishte punuar pa pagesë për dokumentarin, duke e konsideruar pjesëmarrjen si një nder:
Kalova orë të tëra duke punuar në këtë dokumentar… Nuk mora asnjë qindarkë. Jam e tërbuar që u përfshiva në këtë.
Kardashian shtoi se kishte pranuar të merrte pjesë vetëm pas muajsh reflektimi, pasi iu tha se projekti nuk mund të realizohej pa të, por tashmë është e vendosur:
Nuk do të bëj më kurrë asgjë me Lamarin.
Duke iu drejtuar drejtpërdrejt ish-bashkëshortit, nga i cili u nda në vitin 2013 (ndërsa divorci u finalizua në 2016), ajo deklaroi:
Çdo gjë është shaka për ty. Ti nuk merr përgjegjësi për asgjë.
Ajo e akuzoi Odom se po kërkon vëmendje dhe e quajti sjelljen e tij “të neveritshme”, duke përmendur edhe një episod të diskutueshëm që lidhej me një kukull që i ngjante asaj:
Sa invazive, sa e neveritshme. Cili është problemi yt?
Në fund, Kardashian foli edhe për ndikimin që kjo marrëdhënie ka pasur në jetën e saj personale, duke pranuar se përvojat e së kaluarës e kanë bërë më të rezervuar në dashuri:
Njerëzit pyesin pse nuk kam dalë në një takim për katër vjet… mund t’ju tregoj për çdo burrë me të cilin kam qenë dhe sa trauma më shkaktoi.
Përplasja mes tyre duket se ka rihapur plagë të vjetra, duke treguar se historia e tyre mbetet ende larg një mbylljeje të qetë.
