Ish-ylli i NBA-së, Lamar Odom, ka marrë një vendim të fortë për jetën e tij personale, duke u shtruar vullnetarisht në një qendër rehabilitimi, vetëm pak javë pas arrestimit të tij në muajin janar për drejtim mjeti nën ndikimin e alkoolit.
Lajmi u konfirmua nga menaxherja e tij, Gina Rodriguez, përmes një deklarate publike të publikuar të mërkurën, më 28 janar.
Sipas saj, 46-vjeçari ka nisur një program trajtimi 30-ditor në një qendër rehabilitimi në Los Angeles, me synimin për t’u përqendruar plotësisht në shëndetin dhe mirëqenien e tij.
Pas një incidenti të kohëve të fundit, Lamar ka bërë një hap pas për të reflektuar dhe për t’u përballur me shkaktarët që ndikojnë tek ai
-u shpreh Rodriguez, duke shtuar se Odom “merr përgjegjësi të plotë për veprimet e tij dhe ka zgjedhur të veprojë në mënyrë proaktive”.
Ky vendim vjen pas një tjetër momenti të vështirë në jetën e ish-basketbollistit, i cili prej vitesh ka folur hapur për betejat e tij me varësinë dhe shëndetin mendor.
Menaxherja theksoi gjithashtu se Odom është mirënjohës për mbështetjen që po merr nga familja, miqtë dhe fansat, dhe se është i vendosur të ecë përpara në një mënyrë më të shëndetshme dhe pozitive.
Kujtojmë se Lamar Odom u arrestua më 17 janar, pasi autoritetet dyshohet se e ndaluan për drejtim mjeti nën ndikimin e alkoolit, shpejtësi mbi normat e lejuara dhe ndërrim të pahijshëm të korsisë. Ai u lirua me kusht dhe pritet të paraqitet në gjykatë të martën, më 17 mars.
Ish-lojtari i Los Angeles Lakers, i njohur edhe për martesën e tij të mëparshme me Khloe Kardashian, ka kaluar më herët disa periudha të vështira shëndetësore dhe shtrime në qendra rehabilitimi. Vendimi i fundit shihet si një përpjekje serioze për të rikthyer stabilitetin dhe kontrollin mbi jetën e tij.
