Presidenti i Republikës, Ilir Meta ka reaguar ashpër në lidhje me ngjarjet episodike të mbrëmjes së djeshme në Lungomare të Vlorës, ku pati një përplasje mes policisë dhe disa biznesmenëve.
Pronarët e lokaleve ishin duke protestuar pasi kërkonin që orari i lejuar i muzikës në lokale të shtyhej më shumë se ora 22:00. Disa video qarkulluan, ku në njërën prej tyre dallohej një grua biznesmene e cila u prangos dhe u shoqërua në polici, mes britmave dhe ulërimave.
Meta i bën apel policisë që të sillet në lartësinë e detyrës së saj, duke dënuar dhunën e mundshme, kryesisht ndaj gjinisë femërore.
Shënimi i Ilir Metës
Duke ndjekur me vëmendje dhe vlerësuar situatën shqetësuese të krijuar mbrëmë në Vlorë, i bëj thirrje Policisë së Shtetit, autoriteteve dhe institucioneve përgjegjëse të dëshmojnë ndjeshmërinë dhe përgjegjësinë e duhur në adresimin e çështjeve, që shqetësojnë biznesin, në përputhje me kuadrin ligjor.
Protestat paqësore janë një e drejtë, që garantohet nga Kushtetuta.
Dhuna e pajustifikuar dhe shporporcionale ndaj sipërmarrësve dhe qytetarëve, në veçanti ndaj grave dhe vajzave është e papranueshme dhe e dënueshme.
Jo arroganca dhe arbitrariteti, por dialogu i sinqert dhe bashkëpunimi i ofruar nga shteti ofrojnë patjetër mundësi për arritjen e një zgjidhjeje të pranueshme.
Kurrsesi Vlora nuk e meriton një trajtim të tillë!
