Një studim i fundit ka zbuluar se peshkaqenët pranë brigjeve të Bahamas kanë në gjakun e tyre substanca si kafeina, qetësues dhimbjesh dhe madje edhe kokainë. Hulumtimi, i udhëhequr nga biologë detarë, analizoi mostrat e gjakut të 85 peshkaqenëve pranë ishullit Eleuthera, ku u zbulua se rreth një e treta e tyre kishin gjurmë të këtyre substancave.
Shkencëtarët besojnë se këto kimikate mund të kenë hyrë në mjedisin detar përmes ujërave të ndotura dhe rrjedhjeve të ujërave të zeza, ndërsa një tjetër burim i mundshëm janë aktivitetet njerëzore si zhytja dhe ndotja direkte në ujë. Studimi thekson se kjo është një provë e qartë e ndotjes në rritje edhe në zona që konsiderohen të pastra, duke ngritur shqetësime për ndikimin në ekosistemet detare.
Ekspertët paralajmërojnë se këto substanca mund të ndikojnë në sjelljen dhe funksionet biologjike të peshkaqenëve, megjithëse efektet afatgjata mbeten ende të paqarta. Ky zbulim konsiderohet si një sinjal alarmi për nevojën urgjente të ndërhyrjes ndaj ndotjes së oqeaneve dhe mbrojtjes së jetës detare.
Peshkaqenët e Bardhë të mëdhenj në Detin Mesdhe janë në rrezik zhdukjeje dhe peshkimi i paligjshëm po kontribuon drejt kësaj rruge. Sipas një studimi nga shkencëtarët amerikane, në partneritet me organizatën britanike të bamirësisë “Blue Marine Foundation”, peshkaqenët e bardhë të mëdhenj janë ndër speciet më të kërcënuara dhe shumë po shiten në tregjet e peshkut të Afrikës së Veriut.
Peshkaqenët e bardhë të mëdhenj janë një nga më shumë se 20 speciet e peshkaqenëve mesdhetarë të mbrojtura sipas ligjit ndërkombëtar, që do të thotë se është e paligjshme t’i peshkosh ose t’i shesësh. Megjithatë, duke monitoruar portet e peshkimit në bregdetin mesdhetar të Afrikës së Veriut, studiuesit zbuluan se të paktën 40 peshkaqenë të bardhë të mëdhenj janë vrarë atje vetëm në vitin 2025.
