Kur presidenti amerikan Donald Trump prezantoi në prill planet e tij për vendosjen e tarifave mbi veturat dhe pjesët e tyre, ai premtoi se “çmimet do të ulen”. Por një studim i ri tregon se ndodh e kundërta.
Sipas një analize nga Cars.com, e bazuar në të dhënat e inventarit të shitësve për gjysmën e parë të vitit 2025, shitja e veturave të reja nën çmimin 30,000 dollarë po pëson një ngadalësim të ndjeshëm.
Kjo kategori e tregut është më e goditura nga tarifat, pasi 92% e këtyre modeleve janë të importuara.
Studimi gjithashtu zbulon se prodhuesit e automjeteve po përqendrohen gjithnjë e më shumë në prodhimin e modeleve të nivelit më të ulët dhe më të lartë, duke lënë mënjanë segmentin e mesëm, i cili ka shënuar një rënie të lehtë në prodhim dhe kërkesë.
Kjo strategji shihet si përpjekje për të balancuar ndikimet e tarifave: veturat më të lira janë tërheqëse për konsumatorët që vuajnë më shumë nga rritja e kostove, ndërsa veturat më luksoze mbeten më fitimprurëse për kompanitë.
Megjithatë, përkundër synimeve fillestare të administratës Trump, të dhënat tregojnë se tarifat nuk po rezultojnë në ulje të çmimeve për konsumatorët – përkundrazi, po ndikojnë në ngushtimin e ofertës për modelet më të përballueshme.
