Nëse jeni lodhur nga turmat dhe çmimet e larta, ka disa parajsa bregdetare larg syve të publikut. Ndërsa plazhet me famë si Malaga, St. Tropez apo St. Ives mbeten destinacione klasike të verës, gjithashtu sjellin radhë për shezlongë, fotografi të njëjta në Instagram dhe shumë njerëz që konkurrojnë për një hapësirë nën diell. Por këtë vit, sipas platformës së udhëtimeve Hellotickets, luksi i vërtetë është privatësia.
Playa de Gulpiyuri
Për të ndihmuar udhëtarët që kërkojnë qetësi dhe natyrë të paprekur, Hellotickets publikoi listën e 10 plazheve më të izoluara për të vizituar në Europë gjatë verës. Të aksesueshëm vetëm me varkë, makinë 4×4 apo ecje të gjatë, këto vende janë larg rrugëve të zakonshme turistike, por ofrojnë bukuri të rrallë.
Në krye të listës është Playa de Saleccia në bregun verior të Korsikës, në mes të shkretëtirës së Agriates. Me rërë të bardhë dhe gjire të fshehura, uji i kristaltë është ideal për zhytje dhe hapësira e bollshme ju lejon të shtriheni pa u shqetësuar nga fqinjët. Megjithatë është mirë të merrni me vete ushqim, ujë dhe krem dielli, pasi plazhi nuk ka shumë hije apo shërbime.
Në vendin e gjashtë, plazhi Seixal në Madeira ofron një pamje krejt ndryshe: rërë e zezë vullkanike dhe ujëra të kaltër të rrethuar nga shkëmbinj të gjelbër. Nga aty mund të eksploroni edhe pyllin Laurissilva përmes shtegut të ecjes që kalon pranë një shtëpie guri, dikur strehë gjatë Luftës së Dytë Botërore. Plazhi ofron edhe dushe, kajakë me qira dhe një bar për freskim.
Madeira
Nëse doni më shumë aktivitete, provoni Golden Beach në ishullin Paros të Greqisë. Plazhi ofron shezlongë, çadra dhe ture zhytjeje për të eksploruar shpellën Panderonisi. Për aventurierët, është edhe një nga vendet më të mira për sporte si windsurf dhe kitesurf. Pas aktiviteteve, mund të shijoni një vakt në restorantet buzë detit.
Paros
Lista e plotë e plazheve sekrete të Europës për verën 2025:
Playa de Saleccia, Korsikë, Francë
Playa Gulpiyuri, Asturias, Spanjë
Praia da Marinha, Algarve, Portugali
Cala Goloritzé, Sardenjë, Itali
Elafonissi Beach, Kretë, Greqi
Seixal Beach, Madeira, Portugali
Golden Beach, Paros, Greqi
Kleopatra Beach, Alanya, Turqi
Ramla Bay, Gozo, Maltë
Luskentyre Beach, Harris, Skoci
Në këto vende, verën mund ta shijoni në paqe, me natyrë të egër, ujëra të kthjellta dhe qetësinë që plazhet më të njohura nuk mund ta ofrojnë. / shqip.al
