Nëse do të pyesnim njëqind njerëz pse dashurohen, do të merrnim njëqind përgjigje të ndryshme. Por shkenca thotë se, pavarësisht diversitetit, motivet tona për t’u lidhur me dikë rrjedhin nga katër burime themelore.
Një studim i gjerë i publikuar në “Frontiers in Psychology” ka analizuar më shumë se 1,100 të rinj dhe ka zbuluar se njerëzit hyjnë në marrëdhënie për katër arsye kryesore: kujdes dhe dashuri, dëshira për familje dhe stabilitet, status dhe burime dhe seks apo aventurë.
Sipas studiuesve, secili prej këtyre motiveve lidhet me mënyrën si jemi ndërtuar emocionalisht dhe me përvojat e hershme të jetës.
Për shembull, ata që e bazojnë dashurinë te kujdesi dhe përkujdesja kanë më shumë gjasa të kërkojnë partnerë të ndjeshëm dhe të qëndrueshëm emocionalisht.
Ndërsa ata që udhëhiqen nga aventura apo statusi, shpesh ndjekin pasione të forta, por më afatshkurtra.
Psikologët shpjegojnë se kuptimi i motivit personal është hapi i parë drejt një marrëdhënieje të shëndetshme.
Shpesh, njerëzit hyjnë në lidhje pa e ditur se çfarë kërkojnë vërtet, ndoshta një ndjenjë sigurie, një partner që plotëson boshllëqe emocionale, apo dikë që pasqyron versionin e tyre më të mirë.
Dashuria është shumëdimensionale: ajo mund të jetë strehë, pasion, projekt jetësor, apo rrugëtim vetëzbulimi.
Por ajo që e bën të vërtetë është sinqeriteti me veten, të dish pse dashuron. Dashuria është universale, por arsyeja pse e ndjekim është personale. Vetëm kur e njohim motivin tonë, mund ta jetojmë plotësisht.
