Sipas gazetës Telegraph, duke cituar Departamentin Amerikan të Shtetit, Shtetet e Bashkuara nuk do të ndërmjetësojnë më në negociatat e paqes midis Ukrainës dhe Rusisë, pasi Vladimir Putin refuzoi të nënshkruante një armëpushim. SHBA-ja mendon opsionet, ku përfshihen sanksione të reja ndaj sektorit bankar rus dhe tarifa 500% për vendet që blejnë naftë, gaz ose uranium nga Moska.
Departamenti i Shtetit tha se po ndryshonte “metodologjinë me të cilën do të kontribuonte” në bisedime dhe nuk do të “fluturonte më nëpër botë pa paralajmërim” për të marrë pjesë në takime.
Donald Trump thuhet gjithashtu se ka nënshkruar raundin e parë të dërgesave të armëve në Kiev nga administrata e tij. Departamenti i Shtetit tha se Kievi dhe Moska tani duhet të paraqesin propozime “konkrete” për t’i dhënë fund luftës dhe duhet të takohen drejtpërdrejt për të zgjidhur konfliktin.
Zyrtarët amerikanë kanë paraqitur mundësi për të rritur presionin ekonomik mbi Rusinë, në një përpjekje për ta detyruar Vladimir Putinin të nënshkruajë një armëpushim në Ukrainë.
Presidenti Donald Trump ende nuk ka marrë një vendim, por opsionet përfshijnë sanksione të reja ndaj sektorit bankar rus dhe tarifa 500% për vendet që blejnë naftë, gaz ose uranium nga Moska.
Nënpresidenti amerikan, JD Vance, paralajmëroi se lufta në Ukrainë nuk pritet të përfundojë së shpejti, duke theksuar se tani u përket Kievit dhe Moskës të arrijnë një marrëveshje. Duke folur për Fox News, z. Vance tha se Presidenti Trump kishte arritur t’i ulte të dyja palët në tryezën e bisedimeve, por se SHBA nuk do të udhëheqë më përpjekjet për të ndërmjetësuar paqen.
Komentet vijnë ndërsa Kremlini ka shprehur gatishmërinë për bisedime të drejtpërdrejta, por ka refuzuar një propozim të fundit për paqe nga SHBA, duke argumentuar se ai nuk përfshinte njohjen ndërkombëtare të territoreve të pushtuara nga forcat ruse.
