Selena Gomez është përfshirë në një stuhi reagimesh në rrjetet sociale pasi një koment i saj pas ndeshjes së katërt të Finales së NBA-së u interpretua nga shumë fansa si një thumbim ndaj mikeshës së saj të ngushtë, Taylor Swift.
Gjithçka nisi pasi Swift ishte një nga emrat më të komentuar në tribunat e arenës, ku festoi me entuziazëm fitoren e ekipit të saj të zemrës, New York Knicks, ndaj San Antonio Spurs.
Ndërkohë, Gomez, e cila është prej vitesh mbështetëse e Spurs dhe ka origjinë nga Teksasi, publikoi një mesazh që ndezi menjëherë debatet online.
Respekt maksimal për ndeshjen! Urime për ata që e përfaqësuan ekipin! Çfarë rikthimi! Sa qesharake që disa papritur janë bërë tifozë tani
-shkroi ajo.
Komenti u interpretua nga shumë përdorues si një kritikë ndaj figurave të njohura që u shfaqën në ndeshje, përfshirë Taylor Swift, ndërsa rrjetet sociale u mbushën me teori se këngëtarja po ironizonte mikeshën e saj.
Polemika mori përmasa aq të mëdha sa Gomez u detyrua të reagojë publikisht të nesërmen.
U zgjova dhe mora pafund mesazhe. Nuk do t’i ofendoja kurrë miqtë e mi dhe komenti im nuk ishte aspak një fyerje
-sqaroi ajo në Instagram Story.
Ajo shtoi se mesazhi ishte një reagim ndaj një postimi tjetër dhe se po bënte shaka me miqtë e saj, me të cilët kishte vënë baste për rezultatin e ndeshjes.
Kam humbur bastin dhe po ngacmoja miqtë e mi. Besoni ose jo, kam edhe miq të tjerë në jetën time. Dhe në fund të fundit… është vetëm një ndeshje basketbolli
-shkroi Gomez.
Megjithatë, sqarimi nuk i ndaloi menjëherë komentet. Disa përdorues vazhduan të spekulonin se mesazhi ishte një thumbim i fshehtë ndaj Swift, ndërsa të tjerë dolën në mbrojtje të Gomez duke argumentuar se ajo po tallej me familjarët dhe miqtë e saj nga Teksasi që kishin mbështetur Knicks.
Pavarësisht zhurmës së krijuar, marrëdhënia mes Selena Gomez dhe Taylor Swift konsiderohet një nga miqësitë më të forta në showbiz. Dy këngëtaret janë mike prej më shumë se një dekade dhe kanë mbështetur vazhdimisht njëra-tjetrën si në jetën personale ashtu edhe në karrierë.
Në fund, ajo që nisi si një koment sportiv u kthye në një debat viral, duke detyruar Selena Gomez të sqarojë publikisht se Taylor Swift nuk ishte kurrë objektivi i mesazhit të saj.
