Publikimi i shumëpritur i albumit të ri nga P Diddy është shtyrë me 10 ditë, në një moment që po ngre gjithnjë e më shumë pikëpyetje për situatën e tij aktuale.
Ky zhvillim vjen vetëm disa javë pasi dënimi i tij u reduktua me më shumë se një muaj. Sipas të dhënave më të fundit, reperi pritet të lirohet më 15 prill 2028, një datë që ka ndryshuar disa herë, fillimisht ishte parashikuar 4 qershor 2028, më pas 25 prill 2028.
Aktualisht, ai po vuan një dënim prej 50 muajsh, pasi u shpall fajtor për dy akuza pas një gjyqi të zhvilluar në New York verën e kaluar.
Megjithatë, ai u shpëtua nga akuza më të rënda, përfshirë trafikimin për shfrytëzim seksual dhe komplot për shantazh, të cilat mund ta kishin çuar drejt burgimit të përjetshëm.
Para dënimit, artisti kaloi rreth një vit në një qendër paraburgimi në Brooklyn, pasi kërkesa e tij për lirim me kusht u refuzua.
Sot, ai ndodhet në FCI Fort Dix, një burg federal në New Jersey, i vendosur në një bazë ushtarake.
Sipas avokatëve të tij, kjo zgjedhje nuk është rastësore: vendndodhja i ofron akses në programe rehabilitimi nga droga dhe mundësi më të lehta për vizita familjare.
Avokati i tij, Teny Geragos, kishte kërkuar më herët këtë transferim, duke theksuar rëndësinë e rikuperimit dhe mbështetjes familjare për artistin.
Ndërsa fansat presin muzikën e re, mbetet mister nëse kjo shtyrje është thjesht teknike… apo një sinjal se diçka më e madhe po ndodh pas skenave.
