Pyetje të shumta janë ngritur mbi mënyrën se si 50 Cent ka përfituar nga dokumentari bombastik i Netflix, “Sean Combs: The Reckoning”, dhe sidomos se si u siguruan pamjet më të diskutueshme, videoja e xhiruar në një dhomë hoteli në Nju Jork, vetëm pak ditë para arrestimit të Diddy-t.
Në rrjetet sociale po qarkullojnë teori të egra. Një faqe në Facebook madje pretendoi se 50 Cent ka fituar mbi 50 milionë dollarë pas një “lufte ofertash” mes platformave streaming. Por deri tani, zero prova.
As 50 Cent, as Netflix nuk kanë publikuar detaje financiare. I vetmi koment i reperit ka qenë se të ardhurat do të përdoren për të mbështetur viktimat e abuzimit seksual… pa sqaruar çfarë nënkupton konkretisht kjo.
Pika më e nxehtë e debatit mbetet videoja sekrete nga hoteli, ku Diddy shihet duke biseduar me avokatin e tij, Mark Agnifilo. Avokatët e Combs kanë reaguar ashpër, duke e cilësuar materialin “të vjedhur” dhe të paautorizuar, madje kanë dërguar edhe letra zyrtare për ndërprerjen e përdorimit.
Megjithatë, regjisorja Alexandria Stapleton ka deklaruar se Netflix e ka blerë çdo material “ligjërisht” pas arrestimit të Combs. Platforma madje ka vendosur edhe një paralajmërim në ekran, duke theksuar se të gjitha pamjet vijnë nga burime të verifikuara.
Në internet, ndërkohë, qarkullojnë spekulime të pakonfirmuara se pamjet mund të jenë shitur nga videografët personalë të Combs, të cilët posedonin kamerën dhe kartat e memories, por as kjo nuk është vërtetuar.
As 50 Cent, as Netflix nuk kanë pranuar të thonë nëse paguan palë të treta për materialin, ndërsa ekipi ligjor i Diddy-t vazhdon të luftojë juridikisht kundër përdorimit të videove.
Skandali sapo ka nisur, dhe misteri i pamjeve sekrete po ndez internetin çdo ditë e më shumë.
