Lëkura e ndjeshme nën gjoks shpesh është e para që vuan nga të nxehtit dhe lagështia verore. Kombinimi i temperaturave të larta, djersitjes së shtuar dhe materialeve të papërshtatshme të veshjeve shpesh shkakton irritime të pakëndshme të lëkurës në pjesët më të mbuluara të trupit. Një nga shqetësimet më të zakonshme me të cilat përballen gratë gjatë verës është skuqja nën gjoks, e cila mund të jetë shumë e bezdisshme dhe nganjëherë, edhe e dhimbshme.
Irritimi zakonisht shfaqet si skuqje, puçrra apo edhe flluska të vogla, të shoqëruara me kruarje dhe djegie. Përveç kushteve natyrore të verës si nxehtësia dhe lagështia, ka edhe shumë faktorë që mund ta përkeqësojnë situatën. Më i shpeshti është veshja me materiale jo të ajrosshme gjatë verës. Materialet sintetike pengojnë lëkurën të “marrë frymë”, duke krijuar më shumë lagështi. Një tjetër shkak është të brendshmet apo sutjenat e papërshtatshme, shumë të ngushta, që shtojnë fërkimin.
Djersitja gjatë ditës, pa larje të rregullt, mund të çojë në grumbullimin e baktereve në këtë zonë të ndjeshme. Pesha e tepërt është gjithashtu një faktor rreziku, pasi krijon më shumë palë të lëkurës ku mund të mblidhet lagështia. Parandalimi është çelësi për të shmangur këtë shqetësim. Zgjidhni rroba dhe materiale të lehta e natyrale. Të brendshmet prej pambuku dhe veshjet nga fibra natyrale lejojnë qarkullimin më të mirë të ajrit dhe pengojnë mbledhjen e lagështisë. Larja e rregullt, sidomos pas djersitjes, ul praninë e baktereve dhe kërpudhave në lëkurë.
Nëse është e nevojshme, pas dushit mund të aplikoni një pudër me veti antibakteriale nën gjoks për të reduktuar lagështinë. Përdorni reçipeta prej materialesh që “marrin frymë” dhe pa tela, që nuk irritojnë më tej lëkurën. Përdorni produkte mjekësore, nëse është e nevojshme. Nëse keni provuar gjithçka dhe problemi vazhdon, kremrat anti-kërpudhë mund të ndihmojnë nëse irritimi është shfaqur. Por, gjithmonë këshillohuni me dermatologun.
