Një hetim i thelluar nga BBC ka nxjerrë në dritë detaje të reja shqetësuese mbi aktivitetet e Jeffrey Epstein në Mbretërinë e Bashkuar, duke zbuluar se ai kishte krijuar një rrjet të organizuar për të strehuar dhe kontrolluar gra të reja në Londër.
Sipas dokumenteve të analizuara, të paktën katër apartamente në zonat luksoze të Kensington dhe Chelsea janë përdorur për të akomoduar gra, disa prej të cilave më vonë dolën publikisht si viktima të abuzimit seksual.
Shumë prej tyre vinin nga Rusia dhe Europa Lindore dhe u sollën në Mbretërinë e Bashkuar edhe pasi Virginia Giuffre kishte ngritur akuza për trafikim. Sipas hetimit, disa prej grave jo vetëm që u shfrytëzuan, por edhe u detyruan të rekrutonin të tjera për rrjetin e tij.
Dokumentet tregojnë se Epstein financonte jetesën e tyre, nga qiraja dhe studimet, deri te shpenzimet e përditshme, duke krijuar një varësi të plotë financiare. Udhëtimet mes Londrës dhe Parisit realizoheshin shpesh përmes Eurostar.
Hetimi sugjeron se aktiviteti i tij në Mbretërinë e Bashkuar ishte shumë më i gjerë nga sa mendohej, duke përfshirë një rrjet të strukturuar me strehim, transport dhe mbështetje financiare, të maskuar si ndihmë.
Megjithatë, pavarësisht indicieve dhe ankesave të shumta, autoritetet britanike nuk ndërmorën një hetim të plotë. Avokatja Tessa Gregory e cilësoi këtë si “të habitshme”, duke theksuar detyrimin ligjor të shtetit për të hetuar raste të dyshuara të trafikimit.
Dokumentet zbulojnë gjithashtu se informacioni mbi aktivitetet e Epstein ishte ndarë me autoritetet amerikane, ndërsa hetime të reja në Francë po shqyrtojnë akuza për trafikim dhe pastrim parash.
Rasti rikthen në vëmendje pyetje serioze mbi dështimet institucionale dhe mungesën e reagimit në kohë, ndërsa mbetet ende e paqartë se sa i gjerë ishte rrjeti dhe kush tjetër mund të ketë qenë i përfshirë.
