Një tjetër projekt i bujshëm televiziv është në zhvillim, duke sjellë në ekran një nga historitë më të diskutueshme të viteve të fundit.
Sony Pictures Television po punon për një serial të ri me titull “Perversion of Justice: The Jeffrey Epstein Story”, i frymëzuar nga libri i gazetares Julie K. Brown.
Projekti do të hedhë dritë mbi hetimin e saj të gjatë dhe të thelluar mbi financierin kontrovers Jeffrey Epstein.
Në këtë produksion, Laura Dern do të mishërojë vetë gazetaren Brown, duke sjellë në ekran përpjekjet e saj për të zbuluar të vërtetën.
Historia ndjek punën disa-vjeçare të saj, gjatë së cilës ajo arriti të identifikojë dhjetëra viktima dhe të inkurajojë të mbijetuarit të flasin publikisht, duke luajtur një rol kyç në rrjedhën e hetimeve që çuan në arrestime të rëndësishme, përfshirë edhe bashkëpunëtoren e Epstein, Ghislaine Maxwell.
Skenari i serialit po shkruhet nga Sharon Hoffman, e cila mban edhe rolin e producentes ekzekutive, së bashku me Eileen Myers.
Në listën e producentëve përfshihen gjithashtu emra të njohur si Adam McKay dhe Kevin Messick.
Ky serial pritet të sjellë një këndvështrim të fortë dhe të detajuar mbi një nga skandalet më të mëdha globale, duke rikthyer në vëmendje një histori që vazhdon të trondisë opinionin publik.
