SpaceX, kompania e Elon Musk, ka arritur një marrëveshje që i jep të drejtën të blejë start-up-in e Inteligjencës Artificiale Cursor për rreth 60 miliardë dollarë, në një lëvizje që synon të forcojë pozitat e saj në garën me rivalët OpenAI dhe Anthropic. Sipas marrëveshjes, SpaceX dhe kompania mëmë e Cursor, Anysphere, do të bashkëpunojnë fillimisht për zhvillimin e mjeteve të avancuara të kodimit dhe “AI për punë njohurish”, ndërsa SpaceX do të ketë opsionin ta blejë plotësisht kompaninë brenda këtij viti.
Nëse marrëveshja nuk finalizohet, SpaceX do të paguajë një tarifë prej 10 miliardë dollarësh si kompensim për bashkëpunimin, një shumë që konsiderohet ndër më të mëdhatë ndonjëherë për një klauzolë të tillë. Cursor, i themeluar në vitin 2022, është një nga start-up-et me rritjen më të shpejtë në Silicon Valley dhe u vlerësua në rreth 29 miliardë dollarë në fund të vitit të kaluar. Ai është i njohur për mjetet që rrisin produktivitetin e inxhinierëve të softuerit përmes Inteligjencës Artificiale.
Lëvizja vjen në një moment kur Elon Musk po përpiqet të mbyllë hendekun me konkurrentët kryesorë në AI përmes kompanisë së tij xAI, e cila tashmë është integruar më ngushtë me strukturën më të gjerë të biznesit të SpaceX. Sipas raportimeve, Musk po ndërton një ekosistem të unifikuar që përfshin hapësirën, infrastrukturën digjitale, rrjetet sociale dhe inteligjencën artificiale, me qëllim krijimin e një platforme të vetme teknologjike në shkallë globale.
Cursor do të vazhdojë të përdorë dhe të zhvillojë modele AI nga disa prej laboratorëve më të mëdhenj në botë, ndërsa SpaceX pritet të ofrojë kapacitete të mëdha kompjuterike për zhvillimin e mëtejshëm të teknologjisë së saj. Marrëveshja vlerësohet si një nga lëvizjet më agresive të Musk në tregun e AI-së, në një kohë kur konkurrenca mes kompanive kryesore të sektorit po intensifikohet ndjeshëm.
