Si stilisti pas disa prej pamjeve më të kërkuara të tapetit të kuq me kliente si Julianne Moore, Michelle Monaghan, Eve Hewson, Rosie Huntington-Whiteley dhe Lily James, Halley Brisker është mjeshtër i stilit “effortless”, që duket i çrregullt, por në fakt është jashtëzakonisht i rafinuar. Në një intervistë për NEWBY HANDS, ai ndan formulat e tij të sigurta për flokë “liquid”, këshilla për volumin perfekt dhe sekretin e bishtit të flokëve që i reziston kohës.
Përdorni një “koktejl” ultra-luksoz për flokët
Pamja ideale janë flokët që njihen si ‘liquid hair’ dhe unë kam krijuar përzierjen time të veçantë që e përdor për të gjithë, pavarësisht tipit të flokëve. Kjo formulë i jep flokëve pamje të ngritur dhe teksturë të pasur. Gjithmonë filloj me një kombinim të Olaplex No.6 Bond Smoother dhe No.9 Bond Protector Nourishing Hair Serum – ky është baza e çdo stili që krijoj. Zakonisht, i përziej me raportin 2:1, por kjo mund të ndryshojë në varësi të tipit të flokëve. Për shembull, për flokë të hollë me rrënjë më të yndyrshme, përdor më pak nga No.9. Kjo përbërje është thelbësore për të arritur një pamje vërtet luksoze.
Sekreti për një “blow-dry” me volum
Shumica përpiqen të ngritin flokët që nga rrënja gjatë tharjes, por një mënyrë më efektive është tharja në drejtim të kundërt të rënies së flokëve. Aplikoni një spray trashës në rrënjë, dhe pastaj, përqendrohuni te “kurora” e flokëve – pjesa nga balli dhe pjesët anësore. Me një furçë të sheshtë, krihni flokët drejt lart, duke i tërhequr fort për të krijuar tension dhe përdorni tharësen me seksione. Kur i lini flokët të bien natyrshëm, do të keni ngritje të mrekullueshme. Për më shumë volum, mos ngacmoni flokët te vijëndarja, por dy gishta më poshtë anash, ngacmoni rrënjët dhe shtoni shampó të thatë ose spray teksturues. Kështu, merrni volum pa humbur shkëlqimin apo pastërtinë e vijëndarjes.
Stiloni majat si profesionist
Unë përdor gjithmonë hekur me kleçkë për të kapur majat e flokëve dhe për t’i kthyer jashtë, brenda ose për t’i drejtuar. Nxehtësia mbyll kutikulën e flokut, duke i dhënë majave shkëlqim dhe përfundim të lëmuar, në vend që të duken të çrregullta apo pa jetë.
Njihni flokët tuaj
Të gjithë frymëzohen nga flokët që shohin online apo në tapetin e kuq, por është thelbësore të kuptoni tipin tuaj të flokëve dhe hapat që duhet të ndiqni për të arritur pamjen që dëshironi. Për flokë të hollë, mund t’i thani pak para stilimit, ndërsa për rezultat si ai i Lily James, unë filloj gjithmonë nga flokë të lagur thellësisht. Çfarëdo lloj flokësh të keni, hapi i parë duhet të jetë gjithmonë përdorimi i shampove dhe balsameve të duhura – kjo është çelësi për çdo stil.
Gjeni këndet që i përshtaten fytyrës tuaj
Nëse e lidheni flokun ngushtë pas koke, shmangni pozicionin shumë të ulët – vendoseni lidhësen sipas vijave natyrale të nofullës apo faqeve, për të ngritur dhe hapur fytyrën. Nëse preferoni bisht të ulët në qafë, sigurohuni që të jetë i butë dhe i lirshëm. Nëse përdorni hekur për kaçurrela, mbajini flokët pas veshëve për 15 minuta për të krijuar një hark natyral. Ky hark tregon vendin e duhur për të filluar formën e kaçurrelës, duke krijuar një formë C elegante që ndjek linjën e syve dhe faqes.
Arrini atë shkëlqimin si në tapetin e kuq
Unë përdor një teknikë të thjeshtë për një përfundim me shkëlqim: me një hekur të sheshtë në temperaturë të ulët, kaloj flokët për të mbyllur kutikulën dhe për të shtuar shkëlqim pa i shtypur. E përdor në pothuajse çdo teksturë flokësh. Edhe kur krijoj pamje më “grunge” si për Olivia Wilde, gjithmonë dua që flokët të kenë një shkëlqim të thellë dhe të pasur.
