Një studim i fundit i publikuar në revistën shkencore “Journal of Behavioral Decision Making” ka nxjerrë në pah një lidhje interesante mes gjumit dhe mënyrës se si menaxhojmë paratë. Sipas studiuesve:
Mungesa e gjumit nuk ndikon vetëm në humorin dhe energjinë tonë gjatë ditës, por mund të ndryshojë edhe mënyrën se si marrim vendime financiare.
Hulumtimi përfshiu më shumë se 1,200 pjesëmarrës, të cilët u analizuan në lidhje me zakonet e tyre të gjumit dhe sjelljen gjatë marrjes së vendimeve ekonomike. Rezultatet treguan se personat që flinin më pak se pesë orë në natë kishin dukshëm më shumë tendencë të merrnin vendime impulsive. Në vend që të mendonin për përfitimet afatgjata, ata përqendroheshin kryesisht tek shpërblimet e menjëhershme.
Gjatë eksperimentit, pjesëmarrësve iu kërkua të zgjidhnin midis dy opsioneve. Një shpërblim më të vogël që mund ta merrnin menjëherë ose një shumë më të madhe që do ta përfitonin pas disa javësh. Personat e privuar nga gjumi zgjodhën shpërblimin e menjëhershëm në rreth 68% të rasteve. Në të kundërt, ata që kishin një cikël normal gjumi e zgjodhën këtë opsion vetëm në 42% të rasteve, duke treguar më shumë durim dhe planifikim.
Sipas studiuesve, kjo sjellje lidhet me ndryshimet që ndodhin në aktivitetin e korteksi prefrontal i trurit, zona që është përgjegjëse për planifikimin, kontrollin e impulseve dhe vlerësimin e pasojave afatgjata. Kur trupi nuk merr pushimin e nevojshëm, kjo pjesë e trurit nuk funksionon në mënyrë optimale, duke bërë që individët të reagojnë më shumë emocionalisht dhe më pak racionalisht. Ekspertët theksojnë se:
Një gjumë cilësor prej rreth 7 deri në 8 orësh në natë nuk është vetëm një çështje shëndeti fizik dhe mendor, por lidhet edhe me mënyrën se si menaxhojmë financat personale dhe marrim vendime të rëndësishme në jetën profesionale.
Ky zbulim merr edhe më shumë rëndësi në një kohë kur puna në distancë, përdorimi i vazhdueshëm i teknologjisë dhe ritmi i shpejtë i jetës kanë prishur rutinat e zakonshme të gjumit për shumë njerëz. Në këtë kontekst, studiuesit sugjerojnë se përmirësimi i cilësisë së gjumit mund të ndikojë pozitivisht jo vetëm në mirëqenien personale, por edhe në mënyrën se si planifikojmë të ardhmen tonë financiare.
