LG Energy Solution ka nënshkruar një marrëveshje prej 4.3 miliardë dollarësh për të furnizuar Tesla-n me bateri për sisteme ruajtjeje energjie (ESS) nga fabrika e saj në Michigan. Bëhet fjalë për bateri të teknologjisë LFP (litium-hekur-fosfat), të cilat nuk varen nga importet kineze, që tashmë përballen me tarifa të larta në SHBA. Kontrata do të zgjasë nga gushti 2027 deri në korrik 2030, me mundësi zgjatjeje deri në shtatë vjet. LGES është aktualisht prodhuesi i vetëm i madh i këtyre baterive në SHBA, duke përfituar nga mungesa e konkurrencës vendase.
Tesla nuk e ka konfirmuar publikisht marrëveshjen, por më herët ka bërë të ditur synimin për të diversifikuar furnitorët larg Kinës. Ndërkohë, biznesi i Tesla-s “për ruajtjen e energjisë” është në rritje, edhe pse përballet me sfida nga zinxhiri i furnizimit dhe tarifat. Tesla po përballet me presion në rritje nga rregullatorët në Kaliforni për shkak të mënyrës se si promovon sistemet e saj Autopilot dhe Full Self-Driving. Autoritetet e Departamentit të Mjeteve Motorike (DMV) akuzojnë Tesla-n se ka ekzagjeruar aftësitë e këtyre teknologjive, duke krijuar pritshmëri të gabuara tek konsumatorët. Në një seancë dëgjimore rregullatorët mund të vendosin pezullimin ose revokimin e licencës së shitjes së Tesla-s në shtet.
Avokatët e Tesla-s argumentojnë se deklaratat janë pjesë e të drejtës së fjalës dhe se sistemet kërkojnë mbikëqyrje aktive nga drejtuesi. Në të njëjtën kohë, Tesla kërkon miratimin për zgjerimin e programit të robotaksive në San Francisko, duke konkurruar me Waymo. Ndërkohë, një proces i ndarë në Florida po shqyrton përgjegjësinë e sistemit Autopilot në një aksident fatal të vitit 2019. Rikujtojmë se Tesla ka nënshkruar një marrëveshje prej 16.5 miliardë dollarësh me Samsung për prodhimin e çipit të saj më të avancuar, AI6.
