Për shumicën prej nesh, dita nuk fillon pa një filxhan kafeje. Por, a e kemi ndaluar ndonjëherë për të menduar se si ndikon kafeja në trurin tonë dhe kur është momenti më i mirë për ta konsumuar?
Sipas një studimi të fundit të publikuar në revistën Nature Neuroscience:
Kafeina ndikon në mënyrë të drejtpërdrejtë në neurotransmetuesit që lidhen me vigjilencën dhe përqendrimin, si dopamina dhe norepinefrina. Por ka edhe një sekret për të përfituar maksimalisht prej saj: koha kur e konsumon ka rëndësi po aq sa sasia.
Studimet sugjerojnë që:
Midis orës 9:30 dhe 11:30 të mëngjesit është koha më efikase për të pirë kafe. Kjo sepse nivelet e kortizolit, hormoni i zgjimit, janë natyralisht më të larta pas zgjimit dhe fillojnë të bien rreth këtij orari. Pirja e kafesë shumë herët mund të ndërhyjë në këtë cikël hormonal dhe të bëjë që trupi të krijojë një tolerancë më të lartë ndaj kafeinës me kalimin e kohës.
Nga ana tjetër, sasia është gjithashtu thelbësore. Ekspertët rekomandojnë maksimumi 3-4 filxhanë në ditë për të rriturit, që barazohet me rreth 400 mg kafeinë. Më shumë se kaq mund të shkaktojë ankth, shqetësim, probleme me gjumin dhe madje edhe dridhje në duar.
Për ata që e konsumojnë kafene për të përmirësuar performancën mendore, një truk i përdorur gjerësisht nga studiues dhe sportistë është “coffee nap”: pini një kafe të vogël dhe flini menjëherë për 15-20 minuta. Kafeina fillon të ndikojë sapo zgjoheni dhe truri është më i freskët e më i gatshëm për të performuar. Pra, kafeja nuk është thjesht një zakon, por një mjet i fuqishëm për funksionin mendor, kur përdoret me kujdes dhe me dije. Ajo mund të jetë aleatja më e mirë e trurit tuaj, për sa kohë që nuk e teproni.
