Cikli menstrual nuk ndikon vetëm në trupin e një gruaje, por edhe në trurin e saj. Studime të reja shkencore kanë zbuluar se ndryshimet hormonale mujore shoqërohen me ndryshime reale në strukturën e trurit, duke ndikuar në zona që lidhen me emocionet, kujtesën dhe sjelljen.
Dy hulumtime të fundit, të bazuara në skanime të detajuara me rezonancë magnetike (MRI), kanë treguar se vëllimi dhe trashësia e disa rajoneve të trurit ndryshojnë në përputhje me nivelet e hormoneve gjatë fazave të ndryshme të ciklit menstrual.
Zonat më të prekura janë ato të sistemit limbik, që luajnë rol kyç në rregullimin emocional dhe kujtesën.
Është sikur truri ndjek një ritëm të shpejtë çdo 28 ditë, në varësi të ciklit
-u shpreh për Washington Post Erika Comasco, profesoreshë e asociuar në Universitetin e Uppsala-s.
Sipas saj, këto studime ndihmojnë në kuptimin më të thellë të mënyrës se si hormonet ndikojnë në strukturën e trurit.
Gjatë ciklit menstrual, estrogjeni dhe progesteroni rriten ndjeshëm në periudha të caktuara. Estrogjeni arrin kulmin rreth ovulacionit, ndërsa progesteroni rritet fort në fazën luteale.
Këto luhatje hormonale, sipas studiuesve, shoqërohen me ndryshime në lëndën e bardhë dhe të hirtë të trurit, duke sugjeruar transferim më të shpejtë informacioni dhe ndryshime në trashësinë kortikale.
Një nga studimet tregoi se nivelet e larta të estrogjenit lidhen me zgjerimin e zonave të trurit të përfshira në kujtesë, si hipokampusi dhe korteksi parahippocampal. Ndërkohë, progesteroni u shoqërua me ndryshime të tjera strukturore në rajone që përpunojnë informacionin shqisor dhe emocional.
Ekspertët theksojnë se ende nuk dihet saktësisht se si këto ndryshime strukturore ndikojnë në sjelljen apo përjetimet e përditshme të grave.
Megjithatë, studiuesja Adriene Beltz nga Universiteti i Miçiganit nënvizon se hapi i radhës për shkencën është të kuptojë nëse këto ndryshime në tru përkthehen drejtpërdrejt në mënyrën se si mendojmë, ndiejmë dhe veprojmë.
Sipas shkencëtarëve, këto gjetje hapin rrugë të reja për studime mbi shëndetin mendor të grave dhe tregojnë se cikli menstrual duhet parë si një “shenjë jetësore” që ndikon jo vetëm në trup, por edhe në tru.
