Komediani dhe aktori amerikan, Bob Saget, ndërroi jetë në moshën 65-vjeçare. I bërë i famshëm me rolin e patriarkut Danny Tanner në serialin televiziv “Full House”, Saget mbylli sytë, siç konfirmon familja e tij në një deklaratë për CNN-in.
E veja e Bob Saget, Kelly Rizzo, tha se ajo është tërësisht e tronditur për vdekjen e papritur të aktorit dhe komedianit në moshën 65-vjeçare. Rizzo, e cila u martua me Saget në tetor të vitit 2018, bëri një deklaratë emocionuese për “Revistën People” për herë të parë që pas ngjarjes tronditëse.
E gjithë zemra ime, Bob ishte absolutisht gjithçka e imja. Jam shumë e tronditur dhe ende nuk e besoj. Jam shumë e prekur nga gjithë dashuria dhe nderimi që morëm nga miqtë tanë, familja, fansat e tij dhe bashkëmoshatarët e tij. Kur të jetë koha e duhur dhe të mund ta kem pranuar këtë që ndodhi, mezi pres të ndaj më shumë detaje me ju nga koha që kalova me të. Faleminderit që keni respektuar privatësinë time.
Saget njoftoi fejesën e tij dhe Rizzo-s në nëntor 2017 në Instagram pas dy vitesh lidhje. Deklarata e Rizzo vjen pasi vajzat e Saget Aubrey, Lara dhe Jennifer, të cilat ai i ndau me ish-gruan e tij, Sherri Kramer, lëshuan deklaratën e tyre duke thënë se ishin “të shkatërruar” nga vdekja tronditëse e babait të tyre.
Ne jemi të shkatërruar për të konfirmuar se Bob-i ynë i dashur ndërroi jetë. Ai ishte gjithçka për ne dhe ne duam që ju të dini se sa shumë i donte fansat e tij, duke performuar live dhe duke sjellë njerëz nga të gjitha sferat e jetës së bashku me të qeshura. Megjithëse ne kërkojmë privatësi në këtë kohë, ju ftojmë të bashkoheni me ne për të kujtuar dashurinë dhe të qeshurën që Bob solli në botë.
