Së fundmi, një pasagjer i cili udhëtonte për në Stamboll ka përjetuar disa orë paniku, pasi mendoi se kishte humbur 4 qentë e tij. Turisti pësoi një krizë nervore dhe shpërtheu në lot sapo mbërriti në aeroportin turk, ku zbuloi se linja ajrore me të cilën po udhëtonte i kishte humbur katër qentë. Pas disa orësh pasigurie dhe dëshpërimi, ai mësoi se qentë e tij ishin gjetur në një aeroport në Zvicër, ku turisti kishte ndalur përpara se të nisej për në Stamboll.
E gjithë kjo skenë u filmua dhe u shpërnda në rrjetin social TikTok. Videoja tregon burrin duke bërtitur në mënyrë të dëshpëruar dhe duke u ankuar te stafi. Turisti bërtiste duke thënë:
Ku kanë shkuar qentë e mi? Ata nuk mund të jenë zhdukur. Ata janë jeta ime, ata janë si fëmijët e mi.
Incidenti ka hapur një debat mes njerëzve sepse ky lloj rasti po bëhet gjithnjë e më i shpeshtë, nga kafshët shtëpiake që përfundojnë duke humbur e deri te disa situata në të cilat ngordhin të shtypur nga bagazhet. Dhjetëra njerëz besojnë se politikat duhet të ndryshohen në mënyrë që kafshët shtëpiake të mund të udhëtojnë me pronarët e tyre.
