Sezoni i fundit i “The Voice Australia” ka qenë një sukses i madh për televizionin Channel Seven që e ka transmetuar deri tani, falë panelit të jurisë që përbëhet nga yjet më të mëdhenj të muzikës. Pra, nuk është për t’u habitur që nuk do të kursejnë asnjë shpenzim për të siguruar sërish rikthimin e trajnerëve të famshëm në vitin 2022 si Rita Ora, Keith Urban, Guy Sebastian dhe Jessica Mauboy.
Jessica dhe Guy, tashmë kanë nënshkruar për sezonin e vitit të ardhshëm, raportojnë mediat e huaja, por ende po flitet për të marrë Ritën dhe Keith. Një burim pranë produksionit ka shprehur se:
Ne jemi duke punuar për kontratën për Ritën. Topi është i gjithi në fushën e saj. Asaj i ofrohen deri në një milion dollarë në sezon, që është një tarifë marramendëse. Është joshëse duke marrë parasysh se nuk do fitojë aq shumë para në turne gjatë situatës me COVID-19.
Guy besohet të ketë një kontratë trevjeçare që do të thotë se ka të ngjarë të shfaqet në sezonet e ardhshme të “The Voice”. Jessica po ashtu ka një mundësi të madhe për kthimin në sezonin e ardhshëm.
Rikujtojmë se, mesa duket fama në rritje në Australi po i pasqyrohet edhe në rritjen e sukseseve të këngëve të saj në këtë kontinent. Ndonëse kënga e saj “Bang Bang” është publikuar në shkurt të këtij viti, ajo tashmë ka shënuar një hyrje të re në ‘Top 10’ këngët më të dëgjuara të momentit në iTunes, në Australi.
Aktualisht “Bang Bang” është kënga e nëntë më e dëgjuar në Australi, teksa në ‘Top 100’ janë edhe këngët e saj “Let you love me” dhe “For you”, një bashkëpunim me këngëtarin Liam Payne, të gjitha këto këngë vijnë si hyrje të reja.
Gjithashtu, Rita Ora, ka lajmëruar fansat e saj se do të realizojë një koncert në majën më të lartë të Parisit, në kullën Eiffel në datën 30 të këtij muaji. Rita do të ngjitet në Kullën Eiffel për të interpretuar live repertorin e saj të këngëve në një koncert virtual, biletat e të cilit kanë dalë tashmë në shitje.
