Pas tragjedisë së djeshme në Himarë ku një gomone në breg të detit, me drejtues Arjan Tasen, masakroi një vajzë 7-vjeçe duke shkaktuar tronditje e indinjatë, kryepolici Gledis Nano nuk u mjaftua vetëm me përjashtimin e tij nga radhët e policisë. I arrestuari për ngjarjen mjaft të rëndë mbante detyrën e shefit të Policimit në Komunitet, në Drejtorinë e Policisë Elbasan. Gjithashtu, ka qenë shef i Komisariatit të Himarës.
Po ashtu, Nano njoftoi shkarkimin nga detyra të të gjithë zinxhirit komandues të Policisë së Kufirit dhe Migracionit Vlorë. Të shkarkuarit janë:
Kryekomisar Shpëtim Hasanaliaj, me detyrë Drejtor i DVKM Vlorë;
Komisar Fatos Muka, me detyrë Shef Sektori i Kufirit në DVKM Vlorë;
Kryekomisar Andon Marko, me detyrë Shef Sektori i Zbatimit të Masave Plotësuese për Kontrollin e Territorit, në DVKM Vlorë;
Nënkomisar Dritan Veizaj dhe Ervis Alisinanaj, me detyrë specialistë pranë këtij Sektori;
Inspektorë Ardian Kamaj, Granit Nuraj, Jonel Ahmeti dhe Juljan Mehmetaj, efektivë të Sektorit për Zbatimin e Masave Plotësuese për Kontrollin e Territorit, në DVKM Vlorë;
Nënkomisar Neritan Buzi, Shef Stacioni i Policisë Kufitare Dhërmi;
Nënkomisar Daniel Likskëndaj, specialist pranë këtij Sektori;
Inspektorë Andrea Zenelaj, Besnik Limaj, Fatos Pashaj dhe Arsen Hasanaj, trupë shërbimi në Stacionin e Policisë Kufitare Dhërmi.
Por, për qytetarët kjo është diçka e momentit për të zbutur disi pasojat e asaj që ka ndodhur e se nuk mjafton. Pas njoftimit në faqen e Policisë së Shtetit në Facebook, komentuesit kërkuan edhe largimin e tij, si dhe të ministrave të Brendshëm e të Turizmit, Bledi Çuçi dhe Mirela Kumbaro.
Mjetet lundruese me shpejtësi e që kryejnë manovra të rrezikshme po kthehen në makthin e pushuesve. Vetëm në pak më shumë se dy javë janë shënuar tre raste aksidentesh, me tre të lënduar, përfshirë një fëmijë 7-vjeç dhe më i fundit e padyshim më i rëndi, ai i një dite më parë me vdekjen tragjike të vajzës 7-vjeçe.
