Ylli i muzikës pop Beyoncé është ngjitur në skenë për performancën e saj të parë që nga viti 2018 në një hotel privat në Dubai. 41-vjeçarja zhvilloi një koncert prej 90 minutash për hapjen e ‘Atlantis The Royal’, i cilësuar si resorti më ultraluksoz në botë, i cili gjithashtu u bashkua me markën e tekilës së Kendall Jenner, 818. Beyoncé doli përpara një turme prej 1500 personash me një fustan të verdhë me tegela dhe një pelerinë skulpturore me pupla.
Besohet se 41-vjeçarja fitoi 24 milionë dollarë për performancën e saj të parë që kur u ngjit në skenë në Festivalin ‘Global Citizen 2018’. Megjithatë, të pranishmëve iu kërkua të mos e regjistronin performancën e saj, me kërkesë paraprake të artistes. Beyoncé performoi 19 këngë për audiencën duke përfshirë një duet me vajzën e saj Blue-Ivy, 11 vjeç, si dhe hite duke përfshirë ‘XO’, ‘Halo’, ‘Drink In Love’ dhe ‘Crazy In Love’.
Sidoqoftë, Bey thuhet se nuk ka performuar asnjë muzikë nga albumi i saj i vitit 2022, “Renaissance”, i cili thuhet se është një letër dashurie për pionierët e muzikës së zezë dhe ‘queer’ të kërcimit. Personat, të cilët janë pjesë e komunitetit LGBTQ+ në Dubai, përballen me disa sfida ligjore pasi homoseksualiteti është i paligjshëm sipas ligjit të Sheriatit në Emiratet e Bashkuara Arabe. Në Dubai, sipas nenit 177 të Kodit Penal të Dubait, ata që marrin pjesë në sodomi konsensuale (seks anal) mund të përballen me deri në 10 vjet burg.
Bashkëthemeluesja e Aleancës “LGB”, Bev Jackson ka goditur yllin, duke pretenduar se performanca e saj hedh një hije mbi mbështetjen e saj për lezbiket dhe homoseksualët. Duke folur për ‘The Telegraph’, ajo tha:
Beyonce është një ikonë e madhe për shumë homoseksualë. Prandaj Aleanca “LGB” është thellësisht e zhgënjyer që Beyoncé ka pranuar të japë një koncert fitimprurës në Dubai, ku aktet e seksit të njëjtë janë një vepër penale, potencialisht e dënueshme me vdekje.
Ndërkohë, ylli i “RuPaul’s Drag Race UK”, Kitty Scott-Claus shkroi në Twitter për të shpjeguar tërbimin e saj, duke shkruar:
Përshëndetje, kam një pyetje. A mund të shpjegojë dikush pse të gjithë po sulmonin David Beckham muajin tjetër, por tani po festonin Beyoncé për performancën në Dubai? Një rregull për njërin dhe një për tjetrin?
Një përdorues tjetër i Twitter-it shkroi:
Beyoncé duke performuar një shfaqje krejtësisht të re për sheikët dhe miliarderët, ndërsa fansat e saj nuk mund të marrin as një thërrime vizuale të “Renaissance”. Dhe në Dubai, që përjashton në mënyrë absolute komunitetin që frymëzoi albumin e saj të fundit.
