Interpoli ka sekuestruar 6.42 milionë doza ilaçesh të falsifikuara dhe të pamiratuara në një operacion global që synonte shitjet e paligjshme të barnave në internet. Interpoli konfiskoi 6.42 milionë doza farmaceutike të pamiratuara dhe të falsifikuara me vlerë 15.5 milionë dollarë amerikanë (13.1 milionë euro) në një operacion të koordinuar në 90 vende, tha agjencia të enjten.
Mallrat e sekuestruara përfshinin ilaçe për mosfunksionim erektil, qetësues, analgjezikë, antibiotikë dhe produkte kundër duhanit. Sekretari i Përgjithshëm i Interpolit, Valdecy Urquiza, tha se ilaçet e falsifikuara nuk janë “vetëm mashtrim”, por një kërcënim për jetën. “Përmes tregjeve online dhe zinxhirëve informalë të furnizimit, kriminelët mund të shfrytëzojnë boshllëqet në mbikëqyrje, duke synuar njerëzit që kërkojnë trajtim të shpejtë ose të përballueshëm. Pasojat mund të jenë të rënda, ose edhe fatale.”
Mbretëria e Bashkuar ishte vendi ku u kapën më shumë doza, -2,122,591 – e ndjekur nga Kolumbia me 1,473,434 dhe Australia me 752,617. “Shkalla e sekuestrimeve në operacionin e këtij viti nënvizon kërkesën e vazhdueshme për ilaçe jashtë zinxhirit të furnizimit të rregulluar”, tha Andy Morling, kreu i Njësisë së Zbatimit të Ligjit Penal në Agjencinë Rregullatore të Barnave dhe Produkteve të Kujdesit Shëndetësor të Mbretërisë së Bashkuar. Ai shtoi se:
Grupet e krimit të organizuar po e shfrytëzojnë këtë kërkesë dhe po e vënë shëndetin e njerëzve në rrezik serioz.
Agjencia gjithashtu gjeti më shumë se 5,000 faqe interneti, faqe të mediave sociale, kanale dhe robotë të automatizuar që tregtojnë dhe shesin ilaçe të paligjshme. Sipas Interpolit, ka pasur një rritje të ndjeshme të ilaçeve të paligjshme antiparazitare, ato që përdoren për të trajtuar infeksionet e shkaktuara nga parazitët, duke përfshirë krimbat, protozoarët dhe ektoparazitët.
