Filmi biografik “Michael”, që sjell në ekran jetën e Michael Jackson, pritet të ketë premierën në kinema më 24 prill, duke u konsideruar si një nga projektet më të shumëpritura të vitit.
Rolin e ikonës së muzikës e interpreton Jaafar Jackson, kushëriri i artistit legjendar, i cili u përzgjodh pas audicionesh të zhvilluara në mbarë botën.
Projekti i Lionsgate synon të ofrojë një portret emocional dhe autentik të jetës së Michael, nga fillimet me Jackson 5 deri te fama globale, triumfet dhe sfidat personale.
Vetë Jaafar e përshkroi këtë rol si një përvojë shumë personale:
Nuk kam ëndërruar kurrë të bëhem aktor, por e dija që kjo ishte një mundësi e veçantë. Duhej ta meritoja rolin dhe të isha sa më autentik si Michael.
Regjisori Antoine Fuqua vlerësoi performancën e tij, duke theksuar lidhjen e veçantë shpirtërore me personazhin dhe aftësinë natyrale për ta sjellë në jetë në ekran.
Filmi përfshin një kast të fuqishëm: Colman Domingo në rolin e Joe Jackson dhe Nia Long si Katherine Jackson, ndërsa Michaelin në fëmijëri e luan Juliano Krue Valdi.
Skenari është shkruar nga John Logan dhe prodhimi është udhëhequr nga Graham King, i njohur për suksesin e Bohemian Rhapsody.
Traileri zyrtar, i publikuar në shkurt 2026, ka dhënë një paraqitje të parë të transformimit të Jaafarit në Michael, duke rikrijuar disa nga performancat më ikonike të këngëtarit. Me mbështetjen e plotë të familjes Jackson, filmi premton një përvojë të fuqishme për fansat, duke ndriçuar jetën dhe trashëgiminë e një prej figurave më të mëdha të muzikës pop.
