Besimi në vetvete është si hija në mesditë. Sa herë mendojmë se e kemi kapur, ajo zhduket papritur. Vetëbesimi ynë përballet me sfida çdo orë të ditës. “Në kohën e rrjeteve sociale, është e pamundur të shmangim krahasimet negative,” thotë Dr. Gary Wood, autor i librit Confidence Karma: How To Become Confident And Help Others Feel Great Too. “Nuk bëhet më fjalë për të mbajtur hapin me të tjerët, por për t’i shtypur të tjerët me çdo rast që na jepet.” Më poshtë është një udhërrëfyes i përpiluar nga trajnerë, psikologë dhe ekspertë të zhvillimit personal për të ndihmuar në rritjen e vetëbesimit.
01. Ngrije vetëbesimin duke ngritur të tjerët
“Kur i bëjmë të tjerët të ndihen mirë, përmirësohet edhe vetëbesimi ynë,” thotë Wood. “Një kompliment sjell përfitime si fizike, ashtu edhe psikologjike, për ty dhe për personin tjetër. Ata do të të perceptojnë më të sigurt në vetvete dhe kjo do të ndikojë pozitivisht në mënyrën si ndihesh ti.
02. Përdor pozicione force dhe merr frymë thellë
“Pozicionohu si fitimtar: duart lart, mjekra lart dhe kraharori përpara,” thotë terapisti David Waters. “Kjo aktivizon një ndryshim pozitiv hormonal, ul nivelin e stresit dhe rrit vetëbesimin.”
Gjithashtu, frymëmarrja e ngadaltë, sidomos kur nxjerr frymën më gjatë, ndihmon në qetësimin e mendjes dhe krijon ndjesi sigurie.
03. Riformuloje identitetin tënd
Shumë njerëz e lidhin identitetin me punën e tyre, thotë Simon Sinek, autor i Find Your Why. Kur humbin punën ose ndryshojnë karrierë, humbasin edhe vetëbesimin. “Unë e përcaktoj veten si një optimist, jo sipas asaj që bëj, por sipas asaj që jam,” thotë ai.
04. Fillo të ushtrohesh
Ushtrimet fizike përforcojnë ndjeshëm vetëbesimin. Shoqata Amerikane e Psikologjisë thekson se krijimi dhe ruajtja e një rutine ushtrimesh përfaqëson një arritje. “Sa më shumë shikon përmirësim fizik, aq më shumë rritet besimi në vetvete,” thotë Joe Warner.
05. Vishu për të ndjerë siguri
“Asgjë nuk e përforcon vetëbesimin si një veshje që të rri mirë dhe të nxjerr në pah,” thotë stilisti Nick Hems. Edhe trajnerja Hattie MacAndrews thekson se veshja mund të ndikojë në mënyrën si ndihesh. “Vishu si versioni më i sigurt i vetes tënde.”
06. Lidhu me të tjerët
Vetëbesimi nuk ka të bëjë me dominimin e bisedës, por me të bërë të tjerët të ndihen rehat. Gjatë një interviste, përqendrohu te krijimi i lidhjes me personin përballë, jo thjesht për të bërë përshtypje.
Bëj pyetje të hapura, si kush, çfarë, si, ku, për të nxitur një bisedë të natyrshme dhe për të treguar interes real.
07. Thuaj “Mjaft” mendimeve negative
“Përdor një fjalë të fuqishme si ‘ndal’ apo ‘mjaft’ për të ndërprerë menjëherë dialogun negativ të brendshëm,” sugjeron Waters. Kur e thuash me zë të lartë, efekti është edhe më i fortë.nGjithashtu, mos qëndro gjatë në mendime negative për të kaluarën. Mëso të pranosh emocionet dhe ec përpara pa e fajësuar veten vazhdimisht.
08. Shkruaj çfarë dëshiron
Shpesh i neglizhojmë dëshirat tona për shkak të përvojave negative. Por, sipas psikologut Nick Wignall, kur i japim vlerë dëshirave tona dhe punojmë për to, rritet vetëbesimi.
Festo fitoret e vogla çdo ditë. Jo vetëm që forcon besimin, por krijon ndjenjën e përparimit të përditshëm.
09. Shiko ndryshe dështimet
“Kur përballesh me një pengesë, përpiqu ta shikosh nga një këndvështrim tjetër,” thotë trajneri Sam McGrath. Në vend që të përqendrohesh te dështimi, vlerëso çfarë funksionoi dhe si mund ta ndërtosh mbi atë sukses.
10. Stërvit mendjen
Sportistët përdorin vizualizimin për të përmirësuar performancën. Imagjinoje veten duke pasur sukses – kjo aktivizon të njëjtat zona në tru sikur ta bëje realisht.
11. Lëre mënjanë sindromën e mashtruesit
Shumë njerëz nënvlerësojnë arritjet e tyre nga frika se do “zbulohet” se nuk janë aq të aftë sa duken. Mbaj shënim arritjet e tua për të ndërtuar një kujtesë pozitive mbi aftësitë që ke. Filloni të përdorni pohime pozitive çdo ditë, si “Unë mundem” apo “Jam i/e aftë”. Edhe nëse fillimisht nuk i beson, efekti i tyre është i provuar.
12. Rrethoje veten me njerëz që të mbështesin
Kalimi i kohës me persona që të mbështesin dhe të motivojnë ndihmon shumë në rritjen e vetëbesimit. Zgjidh të afërm, miq apo mentorë që të frymëzojnë.
13. Ktheji këto këshilla në zakone
“Të gjithë kalojmë momente që na rrëzojnë vetëbesimin,” thotë Waters. “Por kur këto teknika i kthejmë në zakone, situatat stresuese nuk na kontrollojnë më.” Me kalimin e kohës, trupi përshtatet dhe vetëbesimi bëhet më i qëndrueshëm.
