Riktheni vitin 2016. Është trendi që ka përfshirë mediat sociale që nga fillimi i vitit, veçanërisht Instagram-in dhe TikTok-un, duke nxitur mijëra përdorues të ndajnë foto e video nga dhjetë vjet më parë. Arsyeja? Dëshira për të konsumuar përmbajtje më të lehtë e më qetësuese, të postuar në një kohë kur rrjetet sociale përdoreshin si një lloj “ditari” privat dhe mjedisi online nuk ndikohej nga konkurrenca algoritmike.
Karakteristikat: Foto dhe video blu dhe rozë, selfie me efekte Snapchat, xhinse të ngushta, bluza me supe jashtë, aksesorë të mëdhenj dhe referenca për markat që, në atë kohë, përcaktonin se çfarë ishte “cool”. Karakteristikat e gjithçkaje të vitit 2016 janë lehtësisht të dallueshme.
Gjenerata Z, ata të lindur midis viteve 1997 e 2012, si dhe përdoruesit më të vjetër, po kërkojnë një arratisje nga përsosmëria aktuale. Ata ndajnë dhe konsumojnë përmbajtje qetësuese që mund t’i ndihmojë të rijetojnë të njëjtën gjendje mendore që përjetuan në vitin 2016.
Të kujtosh të kaluarën përmes imazheve është e lehtë, e menjëhershme dhe qetësuese. Prandaj, ekziston një arsye psikologjike pas suksesit të këtij trendi.
Viti 2016 mbahet mend si një nga momentet që i paraprinë disa prej ngjarjeve që ndikuan më shumë në botë. Nga pandemia deri te përshkallëzimi i konfliktit, gjithçka që ndodhi pas atij viti kontribuoi në nxitjen e ndjenjave dhe emocioneve padyshim negative. Prandaj, strehimi në të kaluarën duket si zgjidhja e vetme për t’i shpëtuar barrës së së tashmes.
2016-ta para-algoritmik do të mbahet mend edhe si viti i fundit i “lirisë” në mediat sociale.
Ishte i fundit pa praninë e algoritmit. Ndaj, platformat shiheshin dhe përjetoheshin më shumë si ditar personal ku njerëzit mund të ndanin jetën e tyre, madje edhe duke eksperimentuar. 2016-ta ishte gjithashtu viti kur Stories hynë në jetën e përdoruesve të Instagram-it.
Fillimisht ndihmuan në rritjen e komunikimit spontan midis atyre që i përdornin. Por, sot algoritmi dominon dhe postimet e Stories janë si vitrina dyqanesh që duhet të jenë gjithmonë perfekte, të kuruara deri në detajet më të vogla.
Konfirmimi i obsesionit me përsosmërinë
Dikur, secili kishte profilin personal ku ndante çfarë të donte, pa turp apo shqetësim për gjykimin e të tjerëve. Sot, ky nuk është më rasti. Qindra mijëra njerëz kanë krijuar një profil dytësor të quajtur “finsta”. Një llogari private që përdoret për të ndarë përmbajtje më autentike, personale dhe spontane, të gjitha të synuara për një rreth të zgjedhur miqsh. Rritja e këtyre lloje profilesh konfirmon se autenticiteti mungon në mediat sociale e ndoshta përmbajtja e vjetër është e vetmja mënyrë për ta rijetuar.
