Me temperaturat që vazhdojnë të rriten edhe gjatë natës, shumë njerëz po zgjohen të lodhur, të djersitur dhe pa një gjumë cilësor. Por, sipas ekspertëve të gjumit, zgjidhja mund të jetë më e thjeshtë nga sa mendoni dhe nuk lidhet vetëm me ventilatorin apo kondicionerin.
Nëse edhe ju e keni kaluar natën duke u rrotulluar në shtrat për shkak të vapës, nuk jeni vetëm. Netët tropikale, kur temperaturat nuk zbresin nën 20 gradë Celsius, po bëhen gjithnjë e më të shpeshta dhe specialistët paralajmërojnë se ato ndikojnë drejtpërdrejt në cilësinë e gjumit.
Përveç freskimit të dhomës dhe përdorimit të çarçafëve të lehtë, ekspertët thonë se edhe pozicioni në të cilin flini mund të bëjë një ndryshim të madh.
Sipas ekspertes së gjumit Alison Jones, gjumi në krah është pozicioni më i favorshëm gjatë netëve të nxehta.
Ajo shpjegon se kur shtriheni në krah, një sipërfaqe më e madhe e trupit ekspozohet ndaj ajrit, duke lejuar që nxehtësia të largohet më lehtë nga organizmi. Si rezultat, trupi ftohet më natyrshëm dhe zvogëlohet mundësia që të zgjoheni gjatë natës nga ndjesia e mbinxehjes.
Në të njëjtën linjë është edhe eksperti i ergonomisë së gjumit, James Leinhardt, i cili thekson se trupi humbet pjesën më të madhe të nxehtësisë përmes ballit dhe pjesës së poshtme të shpinës.
Kur flini shtrirë në shpinë, një sipërfaqe më e madhe e trupit qëndron në kontakt me dyshekun, gjë që bën që nxehtësia të grumbullohet më lehtë.
Kur flini anash, një pjesë më e vogël e trupit prek dyshekun, kështu që nxehtësia shpërndahet më mirë dhe organizmi ftohet në mënyrë më efikase
-shpjegon Leinhardt.
Në cilën anë është më mirë të flini?
Edhe ana në të cilën flini mund të ketë rëndësi.
Specialisti i mjekësisë së gjumit, dr. Abhinav Singh, thotë se gjumi në anën e majtë mund të jetë veçanërisht i dobishëm për personat që vuajnë nga urthi ose refluksi gastroezofageal.
Kjo ndodh sepse stomaku ndodhet kryesisht në anën e majtë të trupit. Kur flini në këtë anë, acidi i stomakut e ka më të vështirë të ngjitet drejt ezofagut, duke ulur djegien dhe shqetësimet gjatë natës.
Ekspertët vlerësojnë se deri në 10 për qind e njerëzve përjetojnë simptoma të refluksit gjatë gjumit, të cilat shpesh shkaktojnë zgjime të shpeshta dhe lodhje të nesërmen.
Çfarë tjetër mund të bëni për të fjetur më mirë?
Përveç pozicionit të trupit, specialistët rekomandojnë disa zakone të thjeshta që mund ta bëjnë gjumin më të rehatshëm gjatë vapës:
-Freskojeni dhomën para se të shkoni në shtrat.
-Përdorni çarçafë prej pambuku ose materiale që marrin frymë.
-Shmangni ushqimet e rënda dhe alkoolin në mbrëmje.
-Bëni dush me ujë të vakët, jo shumë të ftohtë.
-Qëndroni të hidratuar gjatë gjithë ditës.
Edhe pse asnjë metodë nuk mund ta eliminojë plotësisht ndikimin e temperaturave të larta, ekspertët thonë se kombinimi i një dhome të freskët, çarçafëve të përshtatshëm dhe gjumit në krah mund t’ju ndihmojë të flini më qetë dhe të zgjoheni më të pushuar edhe gjatë netëve më të nxehta të verës.
