Rëndesa në këmbë, ënjtja rreth kyçeve dhe venat që bëhen më të dukshme në fund të ditës nuk janë gjithmonë vetëm një shqetësim estetik. Sipas specialistëve, këto mund të jenë shenjat e para të pamjaftueshmërisë kronike venoze, një çrregullim i qarkullimit të gjakut që kërkon diagnostikim dhe trajtim në kohë.
Sipas “Cleveland Clinic”, trajtimi nuk mund t’i rikthejë në gjendjen e mëparshme valvulat e dëmtuara të venave, por mund të lehtësojë simptomat, të ngadalësojë përparimin e sëmundjes dhe, në disa raste, të mbyllë ose eliminojë venat e dëmtuara, në mënyrë që gjaku të qarkullojë përmes venave të shëndetshme.
Normalisht, venat transportojnë gjakun nga këmbët drejt zemrës falë valvulave të vogla që pengojnë kthimin e tij mbrapsht. Kur këto valvula dobësohen ose dëmtohen, gjaku grumbullohet në vena, presioni rritet dhe ato zgjerohen, duke u bërë më të dukshme nën lëkurë.
Shenjat që nuk duhen anashkaluar!
Nëse venat duken më të fryra në mbrëmje sesa në mëngjes, shfaqen vijëzime blu ose vjollcë në pjesën e poshtme të këmbëve apo pas gjurit, ose përjetoni rëndesë, djegie, ndjesi tendosjeje, ngërçe gjatë natës apo ënjtje të kyçeve, është e këshillueshme të konsultoheni me një mjek.
Simptomat zakonisht përkeqësohen pas orëve të gjata në këmbë ose ulur. Ndërsa kremrat dhe xhelat mund të japin lehtësim të përkohshëm, ato nuk e korrigjojnë dëmtimin e valvulave dhe nuk e trajtojnë shkakun e problemit.
Si mund të ngadalësohet përparimi i sëmundjes?
Edhe pse venat e dëmtuara nuk mund të rikthehen në gjendjen fillestare, simptomat mund të kontrollohen me ndryshime në stilin e jetesës. Ecja dhe aktiviteti fizik i rregullt, shmangia e qëndrimit të zgjatur ulur ose në këmbë, mbajtja e peshës trupore nën kontroll dhe përdorimi i çorapeve medicinale kompresive janë ndër masat më të rekomanduara.
Në rastet më të avancuara, ekzistojnë trajtime minimalisht invazive, si mbyllja e venave me laser ose teknika të tjera moderne, të cilat përjashtojnë venën e dëmtuar nga qarkullimi. Gjaku më pas ridrejtohet në venat e shëndetshme dhe shumica e pacientëve rikthehen shpejt në aktivitetet e zakonshme.
Pse venat mund të shfaqen sërish?
Ekspertët sqarojnë se, pas trajtimit, zakonisht nuk rikthehet e njëjta venë, pasi ajo është mbyllur ose eliminuar nga qarkullimi. Megjithatë, nëse ekziston predispozitë gjenetike ose faktorë të tjerë rreziku, me kalimin e kohës mund të preken vena të tjera.
Për këtë arsye, kontrollet periodike dhe kujdesi i vazhdueshëm për shëndetin e venave janë thelbësorë. Diagnostikimi dhe trajtimi në fazat e hershme mund të parandalojnë komplikime më serioze, si ulcerat venoze apo tromboza, duke e bërë kontrollin e sëmundjes shumë më të lehtë.
