Emri i Al Pacinos ka rikthyer vëmendjen e mediave ditët e fundit, pasi aktori legjendar 85-vjeçar është fotografuar në një event në Los Angeles me një unazë ari në gisht, duke ngritur menjëherë spekulime për një martesë të mundshme të fshehtë.
Pamjet u shpërndanë me shpejtësi në rrjetet sociale, ndërsa fansat nisën të pyesnin nëse Pacino i ka dhënë fund beqarisë.
Ngjarja ku u pa aktori u zhvillua më 4 dhjetor, gjatë festës në nder të filmit të ri “One Battle After Another”, projekt i regjisorit Paul Thomas Anderson, ku protagonist është Leonardo DiCaprio.
Mes shumë figurave të njohura të Hollywood-it, Pacino tërhoqi vëmendjen jo vetëm për praninë e tij, por edhe për unazën e artë në dorën e djathtë, që shumëkush e interpretoi si simbol martese.
Spekulimet nuk vonuan, megjithatë përgjigjja zyrtare erdhi shpejt. Përfaqësuesi i aktorit reagoi për revistën “People”, duke hedhur poshtë çdo aludim: “Al Pacino nuk është i martuar”, thuhet në deklaratën zyrtare.
Me këtë sqarim, thashethemet duket se u shuan, të paktën për momentin. Unaza besohet të jetë thjesht një aksesor personal, ndërsa Pacino vazhdon të mbetet një nga figurat më enigmatike dhe më të komentuar të industrisë së filmit.
