Influencuesi kontrovers Andrew Tate dhe vëllai i tij, Tristan Tate, janë paraqitur përpara një gjykate federale në Miami, ku kanë nisur zyrtarisht procedurat për ekstradimin e tyre drejt Mbretërisë së Bashkuar.
Dy vëllezërit u arrestuan në shtetin e Floridës pas një kërkese të autoriteteve britanike, të cilat kanë ngritur ndaj tyre një sërë akuzash të reja, mes tyre përdhunim, trafikim seksual dhe vepra të tjera penale. Ata i kanë mohuar vazhdimisht të gjitha akuzat dhe deklarojnë se janë të pafajshëm.
Gjatë seancës gjyqësore, Andrew dhe Tristan u shfaqën të veshur me uniformat e burgut, me pranga në duar dhe zinxhirë në këmbë. Ata folën vetëm për të konfirmuar para gjykatës se i kuptonin të drejtat e tyre ligjore.
Pas përfundimit të seancës, avokati i tyre, Joe McBride, deklaroi se klientët e tij do ta kundërshtojnë kërkesën për ekstradim. Ai i cilësoi akuzat si të pabazuara dhe argumentoi se procedurat ligjore ndaj vëllezërve Tate janë të padrejta.
Sipas Shërbimit të Prokurorisë së Kurorës në Angli dhe Uells (CPS), akuzat lidhen me ngjarje që dyshohet se kanë ndodhur në periudhën 2010–2017.
Hetuesit pretendojnë se numri i viktimave të përfshira në këtë çështje ka arritur në shtatë, ndërsa në total Andrew dhe Tristan Tate përballen me 59 akuza.
Seanca e radhës është planifikuar të mbahet më 27 korrik, ndërsa autoritetet amerikane do të vendosin nëse dy vëllezërit do të ekstradohen në Mbretërinë e Bashkuar për t’u përballur me procesin gjyqësor.
