Apple po kërkon të shtojë motorë kërkimi me Inteligjencë Artificiale nga OpenAI, Perplexity dhe Anthropic në Safari. Eddy Cue, Zëvendëspresidenti i Lartë i Shërbimeve i Apple, bëri deklaratën gjatë dëshmisë së tij në padinë e Departamentit të Drejtësisë të SHBA-së kundër Alphabet. Zbulimi i Cue ishte pjesë e dëshmisë së tij në lidhje me marrëveshjen e Apple dhe Google prej 20 miliardë dollarësh në vit që e bën Google motorin e kërkimit parazgjedhur në Safari.
Ai vuri në dukje se kërkimet në Safari ranë për herë të parë muajin e kaluar, një ndryshim që ai ia atribuon përdorimit në rritje të Inteligjencës Artificiale. Cue gjithashtu deklaroi se ai beson se ofruesit e kërkimit me Inteligjencë Artificiale do të zëvendësojnë motorët tradicionalë të kërkimit si Google, prandaj Apple po kërkon në mënyrë aktive të shtojë këto shërbime në shfletuesin e saj. Megjithatë, Cue vuri në dukje se këto shërbime ndoshta nuk do të jenë zgjedhjet e para, pasi ai beson se ato ende duhet të përmirësohen.
Kërkimet në Google ranë në Safari për herë të parë muajin e kaluar, tha nënkryetari i lartë i shërbimeve të Apple, Eddy Cue, gjatë gjyqit të Google. “Kjo nuk ka ndodhur kurrë në 22 vjet”-shtoi Cue. Cue e lidhi rënien e kërkimeve me përdorimin në rritje të Inteligjencës Artificiale, të cilën kompania tani po e shqyrton përfshirjen në Safari. Rritja e kërkimit në internet në mjetet e AI-së si ChatGPT, Perplexity, Gemini dhe Microsoft Copilot mund t’i bëjë përdoruesit më pak të prirur për të vizituar Google si mënyrën e tyre kryesore për të gjetur informacion.
Google aktualisht i paguan Apple rreth 20 miliardë dollarë për ta bërë motorin e saj të kërkimit motorin e parazgjedhur në Safari, dhe një rënie në kërkime mund të nënkuptojë më pak para për Apple. “Kam humbur shumë gjumë duke menduar për këtë”-citohet të ketë thënë Cue, kur mori në konsideratë se çfarë do të bënte Apple pa të ardhurat nga Google Search.
