Ashton Kutcher konsiderohet prej vitesh një nga meshkujt më tërheqës të Hollywood-it, ndaj është e vështirë të imagjinohet se ai mund të jetë refuzuar ndonjëherë për shkak të pamjes së jashtme.
Megjithatë, vetë aktori ka zbuluar së fundmi se kjo i ka ndodhur realisht, dhe në një nga momentet më të papritura të karrierës së tij.
Gjatë një bisede me gazetarët, me rastin e promovimit të serialit të ri televiziv të Ryan Murphy-t, “The Beauty”, Kutcher ndau një histori nga e kaluara e tij në botën e modës. Ai tregoi se ishte përzgjedhur për një fushatë ekskluzive të Gucci-t, e drejtuar nga vetë Tom Ford.
Fluturova për në Itali për sfilatën dhe Tom Ford më kërkoi të vishja një Speedo rozë
-kujtoi aktori.
Pesha ime atëherë ishte 80 kilogramë, e mbaj mend saktësisht. Dhe ai tha: ‘Ai është shumë i shëndoshë!’ Pas kësaj, më pushuan nga puna.
Kutcher rrëfeu se sot e kujton këtë episod me humor, edhe pse në atë kohë ishte një përvojë e fortë.
Tani qesh kur e mendoj dhe ai ende këmbëngul: ‘Ishe i shëndoshë!’ Unë i them: isha 80 kilogramë, për çfarë po flet?! Por ai donte një pamje shumë specifike. Kjo nuk do të thotë se unë isha më pak i vlefshëm, thjesht nuk isha ajo që ai po kërkonte
-u shpreh aktori.
Ai shtoi se ky episod i mësoi diçka të rëndësishme: pavarësisht famës apo pamjes, askush nuk është imun ndaj pasigurive.
Nuk ka rëndësi kush je, të gjithë kanë pasiguritë e tyre
-tha Kutcher.
Ndërkohë, aktori po rikthehet fuqishëm në ekran me serialin e ri “The Beauty”, një dramë fantastiko-shkencore e bazuar në librin komik me të njëjtin emër nga Jeremy Haun dhe Jason A. Hurley.
Në kastin e serialit bëjnë pjesë emra të njohur si Evan Peters, Anthony Ramos, Jeremy Pope, Rebecca Hall dhe vetë Kutcher.
Ngjarja sillet rreth një trajtimi misterioz, seksualisht të transmetueshëm, që premton bukuri ekstreme për ata që e përdorin, por që fsheh pasoja vdekjeprurëse.
Ndërsa numri i viktimave rritet dhe paniku përhapet, një hetim i FBI-së përplaset me interesa të fuqishme komerciale, duke e kthyer bukurinë në një armë të rrezikshme.
