Mila Kunis dhe Ashton Kutcher u fotografuan në një dalje të rrallë familjare në Los Angeles, duke treguar unitet pas thashethemeve për probleme në martesën e tyre.
Çifti, i shoqëruar nga fëmijët e tyre Wyatt dhe Dimitri, bëri pazar në Beverly Glen Center. Kutcher, 47 vjeç, dukej i shëruar nga dëmtimi i mëparshëm në kyç, ndërsa të dy aktorët kishin zgjedhur veshje të thjeshta dhe të relaksuara.
Dalja e tyre publike vjen pas polemikave që u ngritën nga letrat mbështetëse për Danny Masterson, i dënuar për përdhunim, si dhe pas thashethemeve për miqësinë e vjetër të Kutcher me Sean “Diddy” Combs, i cili përballet me akuza të rënda për trafikim seksual.
Një burim për Daily Mail ka deklaruar se aktori ndien “keqardhje të thellë” për lidhjen e kaluar me Combs.
Pavarësisht zhurmës mediatike, Kunis dhe Kutcher duket se po e mbajnë jetën e tyre familjare sa më private, duke refuzuar të ndajnë imazhe të fëmijëve në rrjetet sociale.
