Trembëdhjetë vite pas ndarjes së tyre, Ashton Kutcher ka befasuar publikun me fjalët e tij për ish-gruan Demi Moore, duke treguar se koha ka zbutur plagët dhe ka lënë vend për respekt e vlerësim.
Gjatë promovimit të serialit të tij më të ri “The Beauty”, aktori u pyet për ngjashmëritë mes projektit të tij dhe filmit të shumëpërfolur të Demi Moore, “The Substance”, një rol që i solli asaj vlerësime të shumta dhe çmime prestigjioze.
Përgjigjja e Kutcher ishte e drejtpërdrejtë dhe plot admirim.
Para së gjithash, performanca e saj në ‘The Substance’ mori lëvdata të jashtëzakonshme. Jam shumë krenar për të, ishte e shkëlqyer
-u shpreh ai për Entertainment Tonight, duke lënë pas çdo hije tensioni nga e shkuara.
Në serialin “The Beauty”, me autor Ryan Murphy, Kutcher interpreton krijuesin e një ilaçi që premton bukuri perfekte, por me pasoja vdekjeprurëse.
Ndërkohë, në “The Substance”, Demi Moore luan rolin e një ylli në rënie që përdor një drogë ilegale për të krijuar një version më të ri të vetes, një zgjedhje që sjell pasoja të errëta dhe të paparashikuara.
Roli i saj u shpërblye me një Golden Globe, çmimin Critics Choice dhe Screen Actors Guild (SAG), si dhe me një nominim për Oscar, duke shënuar një nga kulmet më të mëdha të karrierës së saj.
Kutcher dhe Moore e nisën lidhjen në vitin 2003, u martuan në vitin 2005 dhe i dhanë fund martesës në vitin 2013, një romancë që asokohe mori vëmendje të madhe për shkak të diferencës së moshës prej 15 vitesh mes tyre.
Aktori u bë edhe njerk i tre vajzave të Moore nga martesa me Bruce Willis: Rumer, Scout dhe Tallulah.
Megjithëse marrëdhënia e tyre u shoqërua me polemika, veçanërisht pas botimit të kujtimeve të Moore në vitin 2019, deklarata e fundit e Kutcher tregon një kapitull tjetër: një ish-bashkëshort që zgjedh të flasë me respekt dhe krenari për suksesin e gruas që dikur ndante jetën me të.
