Katër nga gjashtë anëtarët e ekuipazhit të një avioni ushtarak amerikan për furnizim me karburant gjetën vdekjen pasi aeroplani KC-135 u rrëzua në Irak, siç njofton Komanda Qendrore e SHBA-së (Centcom).
Rrëzimi nuk është rezultat i veprimeve armiqësore apo aleate dhe aksidenti ndodhi mbi hapësirën ajrore mike.
Njësia ushtarake deklaroi se tankeri ishte pjesë e operacioneve të vazhdueshme të SHBA-ve kundër Iranit dhe një nga dy avionët e përfshirë. Mjeti tjetër u ul në mënyrë të sigurt.
Të prodhuar nga Boeing, KC-135 janë të aftë të furnizojnë avionët luftarakë me karburant në ajër e luajnë rol kyç në operacionet ushtarake amerikane. Ata u përdorën gjerësisht gjatë Luftës së Parë të Gjirit për të zgjeruar rrezen e veprimit të avionëve luftarakë dhe bombarduesve.
KC-135 zakonisht ka një ekuipazh prej një piloti, një bashkëpiloti dhe një operatori të sistemit të furnizimit me karburant, por në këtë incident besohet se në bord ndodheshin gjashtë persona.
Centcom e përshkroi rrëzimin si të ndodhur mbi hapësirën ajrore miqësore, por zona ku ndodhi është e njohur për aktivitetin e milicive pro-iraniane. Në televizionin shtetëror, ushtria iraniane pretendoi se një grup aleat e kishte shënjestruar avionin me raketë.
Që nga nisja e konfliktit SHBA-Izrael me Iranin, shtatë ushtarë amerikanë janë konfirmuar të vrarë. Ushtria ka humbur të paktën katër avionë gjatë luftës aktuale. Më herët këtë muaj, tre F-15 u rrëzuan mbi Kuvajt në një “incident me zjarr miqësor”, ku të gjithë gjashtë anëtarët e ekuipazhit shpëtuan.
KC-135 Stratotanker, i prodhuar nga Boeing në vitet 1950 e 1960, ka qenë shtylla kryesore e flotës së furnizimit me karburant të ushtrisë amerikane, duke lejuar avionët luftarakë të kryejnë misione më të gjata, pa u ulur.
