Ish-presidenti amerikan, Barack Obama, ka rrëfyer hapur sfidat që ai dhe bashkëshortja e tij, Michelle Obama, përjetuan pas përfundimit të mandatit në Shtëpinë e Bardhë.
Në një bisedë publike në ‘O2 Arena’ të Londrës, Obama foli me sinqeritet për periudhën e tensionuar që çifti kaloi në vitet e para pas largimit nga politika aktive.
Po dilja nga ajo gropë në të cilën rashë me Michelle-n
-tha ai, duke shtuar se sot martesa e tyre është më e fortë se kurrë.
Sipas Obamës, presioni dhe përgjegjësitë e presidencës patën ndikim të madh në jetën e tyre private, dhe pas largimit nga detyra, iu desh të punonte shumë për të rikthyer ekuilibrin në marrëdhënie.
Deklaratat e tij vijnë mes spekulimeve për një krizë martesore, të cilat u përhapën pas mungesës së Michelle në disa evente publike. Megjithatë, ish-zonja e parë ka mohuar kategorikisht thashethemet, duke theksuar se tërheqja e saj nga skena publike ishte një zgjedhje personale.
Nëse do të kishte probleme serioze, unë do të isha e para që do ta thosha
-u shpreh Michelle në një podcast.
Çifti Obama, të martuar që nga viti 1992, vazhdojnë të jenë një shembull i qëndrueshmërisë dhe bashkëpunimit në çift.
Së fundmi, Michelle publikoi edhe një mesazh prekës për Barack-un, duke e përshkruar si një partner të palëkundur në çdo etapë të jetës së tyre.
