Demi Lovato dhe muzikanti Jordan “Jutes” Lutes janë tashmë të martuar! Çifti kurorëzoi dashurinë e tyre në një ceremoni intime të mbajtur të dielën mbrëma në Kaliforni, ku këngëtarja 32-vjeçare u shfaq mahnitëse me një fustan të personalizuar nusërie nga Vivienne Westwood.
Në një intervistë ekskluzive për “Vogue”, Lovato ndau emocionet dhe detajet e fustanit të saj luksoz.
E dua gjithçka në lidhje me këtë fustan
-u shpreh ajo.
Fustani perlë i bardhë, i gjatë deri në fund të këmbëve, kishte një dekolte elegante “off-the-shoulder”, me një bust korseje që theksonte linjat e trupit të saj.
Ajo e kombinoi veshjen me një vello madhështore në stilin katedrale, prej tulle fildishi.
Jam prej kohësh fanse e dizenjove të Vivienne Westwood. Gjithmonë rikthehesha tek ato forma të siluetës që vënë në pah linjat e trupit dhe përdorimi i korseve është thjesht magjepsës.
Procesi i krijimit të fustanit nisi me një foto inspiruese që këngëtarja kishte gjetur, e më pas, pas pesë provave të ndryshme, ekipi i Westwood krijoi fustanin perfekt për ditën e saj të madhe.
Për pritjen e dasmës, fituesja e çmimit Grammy zgjodhi një tjetër veshje nga Vivienne Westwood – një fustan bust i mëndafshtë në ngjyrë fildishi me detaje me perla, i quajtur “Audrey”.
Për mua ishte shumë i veçantë – çdo fije perle është vendosur me dorë, një nga një. Është një veshje unike që më bën të ndihem e jashtëzakonshme
Kujtojmë se Demi dhe Jutes u takuan për herë të parë në janar 2022 gjatë punës për albumin e Lovatos “Holy Fvck”.
Ata u lidhën profesionalisht për këngën “Substance”, ndërsa më vonë lidhja e tyre u bë edhe romantike. Çifti u fejua në dhjetor të vitit 2023.
Tashmë, Demi Lovato ka filluar një kapitull të ri në jetën e saj personale – me dashurinë e jetës dhe një fustan që përfaqëson më së miri shpirtin dhe stilin e saj.
